Eðlilegur aðlögunartími fyrir kísilverksmiðjuna segir PCC

PCC BakkiSilicon hf. fagnar auglýsingu Umhverfisstofnunar á væntanlegu starfsleyfi fyrir kísilverksmiðjuna á Bakka. Þetta kemur fram í yfirlýsingu frá fyrirtækinu vegna fréttar um  tillögu Umhverfisstofnunar sem birtist í Fréttablaðinu 21. júlí sl. Í tillögunni er lagt til að fyrirtækið fái heimild til að losa fjórfalt meira af ryki en ný lög gera ráð fyrir.

„Eðlilegt er að fyrirtækið fái þann aðlögunartíma sem Umhverfisstofnun gerir ráð fyrir enda var búið að hanna verksmiðjuna og bygging hennar raunar komin á lokastig þegar reglurnar tóku gildi í byrjun mánaðarins. Þegar verksmiðjan verður gangsett verður allt kapp lagt á að ræsingin gangi sem snurðulausast fyrir sig og með stöðugum rekstri verði ryklosun haldið í lagmarki enda er rykið mikilvæg söluvara hjá fyrirtækinu. Aukin ryklosun skerðir því beinlínis tekjur,“ segir í yfirlýsingunni.

Hafsteinn Viktorsson, framkvæmdastjóri fyrirtækisins, sagði í samtali við Fréttablaðið á þriðjudag að fyrirtækið myndi ekki vera í vandræðum með hertari losunarreglur, að aðlögunartímanum liðnum.



Yfirlýsing PPC BakkiSilicon hf. í heild:

Vegna fréttar sem birtist í Fréttablaðinu 21. júlí og Vísi sama dag þar sem segir í fyrirsögn að PCC BakkiSilicon hf. fái „afslátt á rykútblástri“ í væntanlegu starfsleyfi sínu er mikilvægt að upplýsa lesendur um þá staðreynd að í starfsleyfinu verða gerðar strangari kröfur en í sambærilegum starfsleyfum sem veitt hafa verið hér á landi vegna nýrra reglna sem tóku gildi 1. júlí sl. Ennfremur er vert að benda á þá staðreynd að ryk í kísilmálmframleiðslu er mikilvæg söluvara og hefur PCC því beinan fjárhagslegan hag af því að halda losuninni eins lítilli og mögulegt er. 

Fyrri starfsleyfi sem veitt hafa verið fyrir kíslilmálmframleiðslu á Íslandi gera kröfu um 20 mg/Nm3 dagleg meðalgildi í hámarkslosun í rykútblæstri án frekari skilyrða. PCC verður gert að uppfylla þessar sömu kröfu fyrstu tvö starfsárin vegna aðlögunar að nýju reglunum. Eftir það verður hins vegar gerð sú krafa til verksmiðjunnar að dagleg meðalgildi rykmagns í útblæstri fari ekki yfir 5 mg/Nm3 en heimild verður fyrir því að innan við 20% af árlegum starfsstíma geti ryklosunin náð allt að 20 mg/Nm3.



Að mati PCC er eðlilegt að fyrirtækið fái þann aðlögunartíma sem Umhverfisstofnun gerir ráð fyrir enda var búið að hanna verksmiðjuna og bygging hennar raunar komin á lokastig þegar reglurnar tóku gildi í byrjun mánaðarins. Þegar verksmiðjan verður gangsett verður allt kapp lagt á að ræsingin gangi sem snurðulausast fyrir sig og með stöðugum rekstri verði ryklosun haldið í lagmarki enda er rykið mikilvæg söluvara hjá fyrirtækinu. Aukin ryklosun skerðir því beinlínis tekjur.

PCC BakkiSilicon hefur lagt mikinn metnað í undirbúningsvinnu vegna gangsetningar verksmiðjunnar, ekki síst í því skyni að lágmarka umhverfisáhrif til að stuðla að sem víðtækastri sátt um starfsemina. PCC BakkiSilicon fagnar auglýsingu Umhverfisstofnunar á væntanlegu starfsleyfi PCC og opinberri umfjöllun fjölmiðla um starfsemi fyrirtækisins sem hafi það að leiðarljósi að miðla upplýsingum til almennings á faglegum og upplýsandi grundvelli.