Innlent

Var nýbúin að skoða mynd af Louise þegar hún gekk inn í Lyfju

Kolbeinn Tumi Daðason skrifar
Louise Soreda er fædd árið 1995. Hún vissi ekki að verið væri að leita að henni.
Louise Soreda er fædd árið 1995. Hún vissi ekki að verið væri að leita að henni.
Starfsmaður í Lyfju á Selfossi var nýbúin að skoða mynd af Louise Soreda í fjölmiðlum þegar hún stóð allt í einu fyrir framan hana í versluninni. Víðtæk leit hafði staðið yfir að henni í rúman sólarhring eða frá því Lögreglan á Suðurnesjum lýsti eftir henni á miðvikudagsmorgun.

 Louise kom til landsins þann 5. júlí en það var mynd af henni í öryggismyndavél í flugstöðinni í Keflavík sem varð til þess að fyrrnefndur starfsmaður Lyfju kom auga á hana seinni part dags í gær. Louise hefur verið á ferðalagi um Suðurland í félagi við franskan mann sem var einmitt með henni þegar hún átti leið um Selfoss í gær. Voru þau meðal annars í Þórsmörk.

Louise er meðal annars búin að sækja Þórsmörk heim. Myndin er af skála Ferðafélags Íslands í Langadal.Vísir/Vilhelm
Starfsmaðurinn ræddi ekki við Louise heldur hringdi í lögreglu og lét vita að sú franska hefði komið í verslunina. Í kjölfarið hafði lögregla uppi á henni á gangi um bæinn. Lögreglumaður á Selfossi segir þau hafa verið afar geðug, rætt við lögreglu og í framhaldinu farið sína leið.

 Fjölskylda Louise hafði áhyggjur af henni þar sem hún fór til Íslands án þess að láta þau vita. 

 Jón Halldór Sigurðsson, lögreglufulltrúi hjá lögreglunni á Suðurnesjum, segir í samtali við fréttastofu að ábendingar frá almenningi hafi skipt hundruðum og að lokum barst ein, frá starfsmanni Lyfju, sem lokaði málinu. Louise hafi rætt við fjölskyldu sína í Frakklandi og von sé á meðlimum hennar til landsins.

 „Mér skilst að við séum að fá fjölskylduna hingað upp og þau ætli að taka ferðalag hérna saman í kjölfarið á þessu,“ segir Jón Halldór.

Mest lesið


Fleiri fréttir

Sjá meira


×

Mest lesið