Segir óheimilt að styrkja kirkjubyggingu á Hvolsvelli

Oddur Einarsson, framkvæmdastjóri kirkjuráðs, segir Stórólfshvolssókn ekki hafa fengið áður ákveðin framlög til að byggja nýja kirkju vegna þess að skilyrðum fyrir því hafi ekki verið mætt.

Stórólfshvolssókn hefur stefnt þjóðkirkjunni vegna samtals 90 milljóna króna fjárframlaga, sem kirkjuráð samþykkti á árinu 2011 að veita til byggingar nýrrar kirkju í sókninni, sem ekki skiluðu sér nema að mjög litlu leyti eins og fram kom í Fréttablaðinu síðastliðinn mánudag.

Oddur segir málið í grunninn vera afskaplega einfalt. Jöfnunarsjóði sókna sé óheimilt að styrkja kirkjubyggingar nema þremur skilyrðum sé fullnægt.

„Stórólfshvolssókn hefur ekki tekist að uppfylla þessi skilyrði og þar með er kirkjuráði ekki heimilt að styrkja bygginguna. Þetta hefur sóknarnefndinni og byggingarnefndinni verið tilkynnt árlega af starfsmanni Jöfnunarsjóðs en hún neitar að horfast í augu við þessar staðreyndir,“ segir Oddur.

Séra Halldór Gunnarsson, fyrrverandi sóknarprestur í Holti og nú formaður byggingarnefndar Stórólfshvolssóknar, gagnrýndi framgöngu þjóðkirkjunnar í málinu harðlega í áðurnefndri frétt Fréttablaðsins. „Það er algerlega með ólíkindum hvernig kirkjuráð hefur hagað sér í þessu máli,“ sagði Halldór meðal annars.

„Það hlálegasta við málið er að formaður byggingarnefndarinnar, Halldór Gunnarsson, sat í kirkjuráði þegar þessar reglur um skilyrði úthlutana styrkja úr Jöfnunarsjóði sókna voru samdar,“ segir Oddur Einarsson.

Þau þrjú skilyrði, sem Oddur segir að uppfylla þurfi til að fá styrki til kirkjubygginga úr Jöfnunarsjóði, eru eftirfarandi:

Að fyrir liggi þarfagreining sóknarinnar, þarfir þar hæfilega metnar og kirkjuráð samþykki hana. Að fyrir liggi fjármögnunaráætlun þar sem heildarfjármögnun sé tryggð með skuldbindandi yfirlýsingum allra sem að verkefninu koma. Að fyrir liggi rekstraráætlun þar sem sýnt sé fram á getu safnaðarins til að standa undir rekstri mannvirkisins.