800 þúsund á tímann að fljúga með gæslunni

Á undanförnum árum hefur heildarfjöldi útkalla hjá flugdeild Landhelgisgæslunnar vaxið verulega. Árið 2011 voru útköllin 155 en í fyrra voru þau 251. Fjölgunin er um 62 prósent, samkvæmt upplýsingum frá Landhelgisgæslunni. Þrátt fyrir þessa fjölgun hefur flugtímum á ársgrundvelli ekki fjölgað að sama skapi. Af því leiðir að kostnaðurinn hefur heldur ekki aukist í beinu hlutfalli við fjölgun útkalla.

Stjórnstöð Landhelgisgæslunnar fékk fjögur útköll á milli klukkan fimm og sjö á mánudagskvöld. Annað barst svo um nóttina. Á meðal þess sem þurfti að gera var að kalla eftir þyrlu til að sækja mann á Suðurlandi. Fjórir erlendir ferðamenn voru einnig fluttir með þyrlu Landhelgisgæslunnar á Sjúkrahúsið á Akureyri eftir umferðarslys við bæinn Hólabak í Húnavatnssýslu.

Landhelgisgæslan heldur ekki sérstaklega utan um kostnaðinn sem hlýst af útköllum vegna ferðamanna eða annarra. Gæslan hefur þó áætlað að hver flugtími útleggist á um 750 til 800 þúsund krónur.

Útkallið á Suðurlandi í gær, frá því að þyrlan TF-SYN fór í loftið frá Reykjavíkurflugvelli þar til hún lenti þar aftur, tók um það bil einn og hálfan klukkutíma. Tímalengd útkallsins í Húnavatnssýslu er aðeins erfiðara að meta vegna þess að TF-LIF var í öðru útkalli á Vestfjörðum þegar beiðni um aðstoð barst og fór svo beint frá Sjúkrahúsinu á Akureyri austur á Langanes að sækja mann sem slasaðist þar. Ef miðað er við tímann frá því að þyrlan var beðin um að fara á slysstaðinn í Vatnsdal þar til hún lenti við Sjúkrahúsið á Akureyri tók það útkall um klukkustund. Því má reikna með að þessi tvö útköll hlaupi á 1,9 til 2 milljónum króna.

Fram kemur í svari frá Land­helgis­gæslunni að hún kappkosti einfaldlega við að bregðast við þegar aðstoðar er þörf, svo fremi sem tæki og mannskapur séu til taks. Fjölgun útkalla hafi hins vegar haft þær afleiðingar að minni tími gefist til þjálfunar og æfinga áhafna og löggæsla og eftirlit á grunnslóð hafi dregist saman. Fjölgun útkalla undanfarin ár hefur með öðrum orðum verið á kostnað þessara þátta.