Lögin til skoðunar vegna áforma HB Granda

Áform HB Granda um að hætta landvinnslu á Akranesi, sem munu að óbreyttu kosta tæplega 100 starfsmenn fyrirtækisins vinnuna, hafa orðið til þess að viss ákvæði laga um stjórn fiskveiða eru til skoðunar innan stjórnkerfisins. Undir er fyrsta grein fiskveiðistjórnunarlaganna, en þar segir meðal annars að lögin eigi að tryggja trausta atvinnu og byggð í landinu. Undir liggur að andi fiskveiðistjórnunarlaganna er byggðafesta og því var einnig sett ákvæði um forkaupsrétt sveitarfélaga.

Þorgerður Katrín Gunnarsdóttir, sjávarútvegs- og landbúnaðarráðherra, staðfestir að þetta samtal eigi sér stað þessa dagana. Skagamálið dragi fram mikilvægi þess að allt fyrsta ákvæði laganna sé virkt, en ekki aðeins hluti þess. Það sé ekki óeðlilegt að menn spyrji sig hvenær jafnvægi milli hagræðingar innan greinarinnar og byggðafestu sé komið í uppnám – og áform HB Granda á Akranesi dragi þetta skýrt fram.

Aðspurð hvort málið sé komið svo langt að lagabreyting sé íhuguð segir hún svo ekki vera.

„Það á ekki að vera óþægilegt fyrir neinn að þessi mál séu rædd yfirvegað og opinskátt. Það er alveg ljóst að HB Grandamálið dregur mjög skýrt fram það óöryggi sem fiskvinnslufólk býr við og það á líka við um afleidd störf sem treysta á útgerðina. Ég benti á þetta eftir tíu vikna sjómannaverkfall,“ segir Þorgerður. „Samfélagsleg ábyrgð er rík þegar kemur að öllum atvinnugreinum og ekki síst í sjávarútvegi. Við erum að fylgjast með því sem gerist á Akranesi og ég fagna því að Faxaflóahafnir taka af allan vafa um vilja sinn til að byggja upp hafnaraðstöðuna. Svo verðum við að sjá hvað HB Grandamenn gera.“

Þorgerður segir afar mikilvægt að sjávarútvegurinn fái að blómstra áfram, en taka verði tillit til samfélagslegra sjónarmiða um leið. Það jafnvægi sé á ábyrgð stjórnmálanna en líka þeirra sem reka fyrirtækin.

„Ég mun á næstunni skipa þverpólitíska nefnd sem á að finna fyrirkomulag varðandi gjaldtöku í sjávarútvegi. Það er ekkert óeðlilegt að þessi nefnd horfi til þessara sjónarmiða einnig,“ segir Þorgerður.

Heimildir Fréttablaðsins herma að Skagamálið hafi vissulega ýtt við málinu, en rúmlega árs gamall hæstaréttardómur þar sem Vestmannaeyjabær tapaði máli sem ógilda átti samning Síldarvinnslunnar á Neskaupstað um kaup á útgerðarfélaginu Bergi/Hugin í Vestmannaeyjum, þrýsti einnig á. Þá hafi verið ljóst að forkaupsrétturinn er ekki fyrir hendi og lögin haldi ekki eins og þau voru hugsuð á sínum tíma hvað það varðar heldur.