Lögreglumenn af Suðurlandi voru kallaðir út að heimahúsi í Þorlákshöfn aðfaranótt sunnudags vegna gestkomandi manns sem hafði tryllst. Hafði maðurinn efnt til slagsmála fyrir utan húsið að því er segir í tilkynningu frá lögreglunni á Suðurlandi.
Þegar lögreglumenn komu á staðinn lágu menn yfir honum og héldu. Lögreglumenn voru að ræða við manninn og róa þegar hann fyrirvaralaust sparkaði í andlit og fót eins lögreglumannsins.
Maðurinn var handtekinn og færður í fangageymslu og yfirheyrður. Málið mun verða sent til héraðssaksóknara sem fer með rannsókn mála er varða ofbeldi gagnvart opinberum starfsmönnum.
Trylltist og sparkaði í andlit lögreglumanns
