Tyrkneskum ráðherra vísað frá Hollandi

Fjölskyldumálaráðherra Tyrklands var vísað úr landi í Hollandi snemma í morgun. Lögregla beitti táragasi á hörð og fjölmenn mótmæli tyrkneskra ríkisborgara í Rotterdam. BBC greinir frá.

Ráðherrann var staddur í Rotterdam til þess að afla stuðnings meðal tyrkneskra ríkisborgara í Hollandi við umdeilda þjóðaratkvæðagreiðslu sem miðar að því að auka völd tyrkneska forsetans.

Í gær meinuðu yfirvöld í Hollandi tyrkneska utanríkisráðherranum að koma til Hollands til þess að ávarpa fjöldasamkomu í Rotterdam sem hollensk yfirvöld komu einnig í veg fyrir að færi fram.

Fjölskyldumálaráðherranum var fylgt að landamærum Þýskalands og Hollands að sögn forsætisráðherra Hollands.

Um þúsund tyrkneskir ríkisborgarar komu saman við ræðismannsskrifstofu Tyrklands í Rotterdam til þess að til að sýna tyrkneskum yfirvöldum stuðning. Eftir að fréttist af brottvísun ráðherrans urðu mótmælin hins vegar fjandsamleg og þurfti lögregla að beita táragasi.