Krónan leitar réttar síns vegna brauðbars

Matvöruverslunin Krónan hefur stefnt Árborg og Heilbrigðiseftirliti Suðurlands vegna ákvörðunar eftirlitsins um að brauðmeti í versluninni skuli varið með umbúðum eða öðrum hætti sem tryggir matvöruna gegn mengun. Heilbrigðiseftirlitið gerði athugasemd við að óvarið brauð væri á boðstólum í versluninni því ekkert hindri það að aðilar hnerri eða hósti yfir brauðið.

Málið, sem snýr að svokölluðum brauðbar í versluninni, var þingfest í Héraðsdómi Suðurlands á miðvikudag. Í stefnunni segir að brauðbarir hafi reynst afar vinsælir hjá neytendum á Íslandi og skilað tekjum fyrir verslanir Krónunnar. Þá sé þetta þekkt fyrirkomulag í öðrum löndum, þrátt fyrir að um sé að ræða nokkra nýlundu hér á landi.

Forsaga málsins er að eftirlitsmenn komu í verslun krónunnar í ágúst í fyrra. Eftirlitið gerði í kjölfarið athugasemd um að óvarið brauð væri á boðstólum inni í versluninni og á lager, og tekið fram að ekkert hindri það fólk hnerri eða hósti yfir brauðið, eða meðhöndli það með berum eða óhreinum höndum.

Heilbrigðiseftirlitið fór í tvær aðrar heimsóknir í verslun Krónunnar á Selfossi. Í október síðastliðnum sagði eftirlitið að óvarin brauð yrðu tekin úr sölu ef ekki yrði gripið til úrbóta, og þegar eftirlitsmenn komu öðru sinni, til að fylgja eftir athugasemdum sínum, höfðu starfsmenn Krónunnar verið búnir að setja brauðið í poka á meðan heimsókninni stóð.

Krónan ákvað á endanum, eða í febrúar, að verða við kröfum eftirlitsins og breytti innréttingum í samræmi við kröfur.

Verslunin telur þó að verulegir annmarkar hafi verið á ákvörðun heilbrigðiseftirlitsins og fer fram á bætur vegna þessa, en í stefnunni segir að ákvörðunin hafi verið saknæm og ólögmæt. Þá hafi breytingar á versluninni kostað rúmar 350 þúsund krónur, og að brauðbarnum hafi verið lokað meðan á þeim stóð.  Ónefnt sé sölutap sem Krónan komi til með að verða fyrir vegna minni sölu brauðmetis í lokuðum innréttingum.