Barnaníðingur sem þóttist vera Justin Bieber ákærður fyrir 931 brot

Maður sem þóttist vera poppstjarnan Justin Bieber á netinu hefur verið ákærður fyrir meira en 900 kynferðisbrot í Ástralíu.

Samkvæmt lögreglu í Queensland fór maðurinn, sem er 42 ára, undir fölsku flaggi og þóttist vera kanadíska poppstjarnan til að nálgast kynferðislegar myndir frá börnum. Hann er ákærður fyrir 931 glæp og er talið að hann hafi brotið gegn 157 börnum um allan heim.

Jon Rouse, varðstjóri í Queensland segir glæpina „hryllingslega“ og bað unga aðdáendur söngvarans og foreldra þeirra að vera á varðbergi.

„Það að svo mörg börn hafi trúað því að þau hafi átt í samskiptum við þennan tiltekna fræga einstakling varpar ljósi á að við þurfum að endurskoða hvernig við fræðum börn um netöryggi,“ sagði Rouse.

Lögreglan í Queensland hefur hlotið aðstoð lögregluyfirvalda um heim allan við rannsóknina, þar á meðal í Þýskalandi og frá heimavarnarráðuneyti Bandaríkjanna.

Talið er að 50 börn hafi verið búsett í Bandaríkjunum, allt að 20 í Bretlandi og sex í Ástralíu. Enn er verið að afla upplýsinga um búsetu annarra sem urðu fyrir barðinu á manninum.

Maðurinn átti þegar yfir höfði sér ákæru í Queensland fyrir vörslu á vafasömu efni en eftir leit lögreglu í tölvu hans urðu ákærurnar 931.

Maðurinn hafði meðal annars nýtt sér Facebook og Skype til að eiga samskipti við börnin. Brotin ná aftur til ársins 2007 og er hann meðal annars ákærður fyrir þrjár nauðganir.