Drap tólf manns í nýársveislu í Brasilíu

Maður drap fyrrverandi eiginkonu sína, son og tíu manns til viðbótar í nýársveislu í brasilísku borginni Campinas, um hundrað kílómetrum norðvestur af Sao Paulo, í nótt.

Í frétt BBC kemur fram að maðurinn hafi borið fjölda skotvopna þegar lögregla réðst inn á heimili þar sem veislan var haldin. Maðurinn hafði svipt sig lífi eftir að hafa skotið fólkið, en auk þeirra sem létust, særðust þrír.

Nágrannar segja árásina hafa átt sér stað skömmu fyrir miðnætti og fyrst staðið í þeirri trú að hávaðinn sem barst hafi verið frá flugeldum.

Einn þeirra sem særðist í árásinni tókst að flýja til nágranna og biðja um hjálp og kom lögregla á staðinn nokkru síðar.