Varnarleysið gegn ebólu er úr sögunni með nýju bóluefni

Tilraun með bóluefni gegn ebólu hefur borið góðan árangur. Ebóluveiran er ein sú skæðasta sem herjað hefur á mannkynið, en engar alvörutilraunir hafa verið gerðar til að vinna bug á henni fyrr en faraldur braust út í vestanverðri Afríku árið 2015 og kostaði meira en 11 þúsund manns lífið.

„Þótt þessar afgerandi niðurstöður komi of seint fyrir þá sem létu lífið í ebólufaraldrinum í vestanverðri Afríku, þá sýna þær að þegar næsti ebólufaraldur brýst út þá verðum við ekki varnarlaus,“ segir Marie-Paule Kieny, yfirmaður hjá Alþjóðaheilbrigðisstofnuninni WHO, en hún stjórnaði rannsókninni.

Tilraunin var gerð á 11.841 einstaklingi í Gíneu á árinu 2015. Af þeim fengu 5.837 manns nýja bóluefnið, en hinir fengu lyfleysu til samanburðar. Enginn þeirra sem fengu bóluefnið smitaðist af ebóluveirunni, en úr samanburðarhópnum smituðust 23.

Rannsóknin var samvinnuverkefni WHO með heilbrigðisyfirvöldum í Gíneu, læknasamtökunum Læknar án landamæra og norsku lýðheilsustofnuninni.

Niðurstöðurnar voru birtar í læknatímaritinu The Lancet og kynntar í tilkynningu frá WHO á Þorláksmessu.

Ebóluveiran uppgötvaðist fyrst árið 1976. Síðan þá hefur ebólufaraldur af og til brotist út í nokkrum Afríkuríkjum, en aldrei náð mikilli útbreiðslu fyrr en árið 2015.

Þá gerðist það líka í fyrsta sinn að smitið barst til Vesturlanda. Og þá fyrst hófust fyrir alvöru tilraunir með bóluefni. Þær tilraunir hafa nú borið árangur, aðeins hálfu öðru ári eftir að þær hófust.

Tilraunin var gerð í Vestur-Afríkuríkinu Gíneu, á svæði þar sem ný smit voru enn að greinast þegar hún hófst.

Þess var gætt að þegar einhver greindist með smit þá fengu allir sem hinn smitaði hafði umgengist næstu þrjár vikurnar á undan þetta bóluefni.

„Ebólan skildi eftir sig gríðarmikla eyðileggingu í landi okkar,“ segir Keita Sakoba, yfirmaður ebóluviðbragða við heilbrigðisstofnun Gíneu. „Við erum stolt af því að hafa getað komið með framlag til þess að þróa bóluefni sem kemur í veg fyrir að aðrar þjóðir þurfi að ganga í gegnum það sama og við höfum gert.“