Getnaðarvarnarsprauta fyrir karlmenn ber árangur

Ný hormónasprauta fyrir karlmenn veitir 96 prósent vörn gegn getnaði. Þetta kemur fram í niðurstöðum nýrrar rannsóknar á vegum bresku heilbrigðisþjónustunnar sem birtar voru fyrr í mánuðinum. 

Framkvæmd rannsóknarinnar fólst í því að prófa getnaðarvörnina á hundrað 266 kynferðislega virkum pörum í eitt ár. Í lok árs höfðu aðeins fjórar konur orðið þungaðar.

Virknin er ögn minni en í tilfelli getnaðarvarnarpillunnar, sem ætluð er konum, en líkurnar á þungun kvenna sem taka pilluna er undir einum á móti hundrað. Líkurnar á að karl sem sprautaður hefur verið með hormónasprautunni er 1,57 á móti hundrað.

Löng bið eftir getnaðarvörnum fyrir karla

Efni sprautunnar inniheldur tvö hormón, annars vegar hormónið prógesterón sem kemur í veg fyrir sæðisframleiðslu og hins vegar testósterón sem vegur upp á móti prógesteróninu og sér til þess að jafnvægi haldist á hormónastarfseminni.

Til þess tilætlaður árangur náist þarf karlmaðurinn að fá hormónasprautu á tveggja mánaða fresti.

Þróun á hormónagetnaðarvörnum fyrir karlmenn á sér tæplega fjögurra áratuga langa sögu. Fyrstu rannsóknir báru ekki tilskilinn árangur og en frjóleysi í sæði, sem er forsendan fyrir getnaðarvörninni, kom aðeins fram í 65 prósent karlanna sem tóku þátt í þeim.

Enn er engin getnaðarvörn á markaði fyrir karla, að smokknum undanskildum. Lyfjafyrirtæki víða um heim hafa þó hafið rannsóknir á þessum valkosti. Meðal annars er verið að þróa getnaðarvarnarpillu fyrir karlmenn sem á að hafa þau áhrif að sáðlát verður ekki við fullnægingu.

Auk þess er þróun á annars konar sprautu sem kallast Vasalgel langt komin. Vonast er til að sú sprauta, sem er án hormóna, geti farið á markað í kringum 2020. 

Aukaverkanir setja strik í reikninginn

Af þeim 266 karlmönnum sem tóku þátt í rannsókninni fundu tuttugu þeirra fyrir slæmum aukaverkunum og varð það til þess að þeir þurftu að hætta þátttöku fyrr en áætlað var.

Aukaverkanirnar voru meðal annars þunglyndi, bólur og breyting á kynlöngun. Þessum aukaverkunum svipar til þeirra hliðarverkanna sem sumar konur finna fyrir þegar þær taka inn getnaðarvarnarpilluna.

Sjá einnig: Ný rannsókn staðfestir tengsl milli þunglyndis og getnaðarvarnarpillunnar

Aðeins þrír af hverjum fjórum karlmönnum sem tóku þátt í rannsókninni sögðust geta hugsað sér að halda áfram að nota getnaðarvarnarsprautuna. Hún mun ekki fara á markað fyrr að loknum frekari rannsóknum.

„Þrátt fyrir að sprautan hafi náð að sporna gegn þungun að einhverju leyti er þörf á að rannsaka nánar samsetningu hormónanna til þess að sjá til þess að jafnvægi sé á milli virkni og öryggis,“ sagði Mario Festin, meðhöfundur greinarinnar.