Jafnari deild en síðustu ár

FH verður Íslandsmeistari annað árið í röð og í áttunda skiptið alls ef marka má spá forráðamanna, þjálfara og fyrirliða liða í Pepsi-deild karla. Tímabilið hefst á sunnudag.

Það kemur Davíð Þór Viðarssyni, fyrirliða FH-inga, ekki á óvart að ríkjandi Íslandsmeisturum sé spáð áframhaldandi velgengni. „Við erum þar fyrir utan vanir því að vera spáð einu af efstu sætunum og það á ekki að hafa áhrif á okkur,“ sagði Davíð Þór í samtali við Fréttablaðið í gær.

Það má þó búast við að önnur lið veiti FH samkeppni um titilinn og fleiri lið sem mæta sterkari til leiks nú en oft áður, eins og Davíð bendir á.

„KR er með mjög gott lið eins og alltaf og þá mætir Stjarnan til leiks með virkilega öflugt lið. Sama má segja um lið eins og Breiðablik, Val og Víking. Þetta verður mjög jöfn deild í ár. Hún var ekki ójöfn í fyrra en ég held að hún verði enn jafnari í ár.“

Alvöru leikir gegn Leikni

Hann bendir á að Leiknismenn, sem féllu úr Pepsi-deildinni í haust, hafi náð að gefa FH-ingum tvo mjög erfiða leiki síðasta sumar.

„Munurinn er alltaf á minnka á milli liðanna. Líkamlegt form leikmanna er betra en áður og þjálfun sömuleiðis. Maður sér líka þegar við í FH erum að spila Evrópuleiki. Í dag á maður alltaf séns. Þannig var það ekki fyrir 5-6 árum.“

Davíð segir að tilfinningin á þessum árstíma sé alltaf sú sama. Tilhlökkunin mikil og menn orðnir óþreyjufullir – vilja einfaldlega fá að byrja að spila alvörufótbolta eftir allt of langt undirbúningstímabil.

„Þessar síðustu 2-3 vikur geta verið erfiðar. En okkar undirbúningi miðar vel og þetta er svipað og verið hefur. Við erum að gera okkur tilbúna – fínpússa síðustu atriði og vera klárir fyrir fyrsta leik.“

Fleiri gervigraslið

Liðum sem spila á gervigrasi hefur fjölgað úr einu (Stjarnan) í þrjú (Þróttur og Valur) á einu ári. Öll þessi þrjú lið eiga heimaleik í fyrstu umferð deildarinnar sem verður leikin á sunnudag og mánudag.

„Ég er ekki brjálaður aðdáandi gervigrasvalla en við spiluðum á Valsvellinum um daginn og hann er frábær.

„Það sem skiptir miklu máli er að það er vökvunarkerfi sem þýðir að það er hægt að bleyta völlinn fyrir leik og í hálfleik. Það breytir miklu,“ segir Davíð Þór sem segir að viðhald gervigrasvalla sé mikilvægt.

„Ef þeim er vel haldið við finnst mér ekkert að því að lið spili á gervigrasi. Það hefur vantað á Íslandi almennt. En þú færð mig aldrei til að segja að ég myndi frekar vilja spila á gervigrasi en náttúrulegu grasi. Við viljum venjulegt gras í okkar klúbbi og ég er talsmaður þess.“

Byggja upp sjálfstraust

Það er spilað þétt fyrstu vikur mótsins þar sem deildin fer að stærstum hluta í frí á meðan EM í Frakklandi stendur í júní. Fyrirliði FH-inga segir það ekki breyta miklu.

„Þó svo að það sé spilað þéttar þá breytir það ekki að mestu máli skiptir að byrja vel og byggja upp sjálfstraust – að senda skilaboð til annarra liða. Það er mikið undir í fyrstu umferðunum eins og alltaf,“ sagði Davíð Þór.

Opnunarleikur Pepsi-deildarinnar, viðureign Þróttar og FH á Þróttarvelli á sunnudag klukkan 16.00, verður í beinni útsendingu á Stöð 2 Sport. Alls verða þrjár beinar útsendingar frá leikjum í fyrstu umferð Pepsi-deildarinnar.