Framkvæmdalok við Miklubraut frestast um sólarhring

Framkvæmdir við lagningu stofnæðar vatnsveitu undir Miklubraut og frágangur eftir þær mun standa sólarhring lengur en fyrirséð var. Takmarkanir á umferð um Miklubraut við gatnamótin við Kringlumýrarbraut munu því standa til föstudagsmorgunsins 11. ágúst en ekki fyrramálsins eins og áður var tilkynnt.

Vinna hófst við að leggja nýja stofnæð vatnsveitu undir Miklubraut, rétt vestan Kringlumýrarbrautar, þann 6. ágúst síðastliðinn. Reiknað var með að verklok yrði á morgun.

Reiknað er með því að umferð gangi hægar um Miklubraut á meðan framkvæmdir standa yfir. Vegfarendum er bent á leiðir um Sæbraut eða Bústaðaveg, einkum á annatíma.