Nítján ára nýstúdent vann milljónir með sínum fyrsta lottómiða

Nýjasti milljónamæringur landsins vann 7.7 milljónir í lottóinu síðasta laugardag. Um nítján ára nýstúdent er að ræða sem gerði sér sérferð til þess að kaupa sinn fyrsta lottómiða vegna þess að hún fann á sér að hún myndi vinna.

Miðinn var tíu raða sjálfvalsmiði með Jóker og fylgdist hún spennt með útdrættinum á laugardagskvöldið og sá strax að lukkan var með henni. Þegar einungis ein tala var eftir sá hún að hún var komin með 4 réttar tölur og það vantaði bara töluna 16. Því urðu mikil fagnaðarlæti í stofunni heima hjá henni þegar að talan sextán kom upp sem síðasta tala kvöldsins.

Unga stúlkan var búin að ákveða að fara í frí frá skóla í eitt ár og fara í Evrópuferð. Ætlar hún sér að halda sig við þau plön og setja megnið af vinningsupphæðinni inn á bankareikning til að nota síðar, til dæmis sem útborgun upp í íbúð þegar sá tími kemur.

Vinningsupphæðinni á laugardaginn var skipt á milli tveggja lottómiða var hinn vinningshafinn voru hjón af Suðurlandi. Þau spila alltaf með í Lottó og kaupa alltaf margviknamiða með sömu tölunum. Þau voru á leið út úr bænum þegar konan mundi að hún ætti eftir að lotta svo það var stoppað við hjá Olís á Selfossi og réttu tölurnar valdar.

Að eigin sögn ætla þau nú ekkert að missa sig yfir þessu en þau eiga nokkur uppkomin börn sem fá að njóta vinningsins með þeim.