Hótaði að gera dóttur parsins mein færu þau ekki til Íslands

Verjendur hollenska parsins sem sætir ákæru fyrir stórfelldan innflutning á fíkniefnum til landsins með Norrænu í september segja ekkert í framburði ákærðu sem bendi til þess að konan hafi verið meðvituð um tilgang ferðarinnar. Þvert á móti séu engin sönnunargögn eða nokkuð annað sem tengi hana við fíkniefnaflutninginn.

Atriði sem saksóknari telji til um hvort halda hafi átt til Spánar, um verslunarferð til Belgíu, framburð dóttur og nágranna séu ekki bara ósönnuð atriði heldur einnig aukaatriði sem skipti ekki svo miklu máli. Ekkert bendi til þess að hún hafi vitað af fíkniefnunum í niðursuðudósunum. 

Maðurinn hefur frá upphafi játað sök í málinu en konan neitað. Saksóknari telur þau hafa ákveðið fyrirfram að yrðu þau gripin myndi maðurinn taka á sig alla sök. 209 þúsund e-töflur og 10 kíló af MDMA-mulningi fundust í húsbíl þeirra við komuna til landsins með Norrænu í september síðastliðnum.

Hótun frá hættulegum Hollendingi

Gísli Auðbergsson, verjandi mannsins, benti fyrir dómi á maðurinn hefði borið því við að hafa kynnst vafasömum mönnum í fíkniefnaheiminum sem hefðu ákveðið einhliða að hann skuldaði þeim peninga. Þeir hafi hótað að gera fósturdóttur hans mein færi hann ekki í ferðina til Íslands. 

Hann hefði áður neitað að fara en sá ekki annað í stöðunni en að fara í ferðina. Hefði hættulegum glæpamanni frá Hollandi verið sigað á hann og haldið uppi fyrrnefndri hótun. Þess hefði verið krafist að hann tæki konu sína með til að auka trúverðugleika ferðarinnar.

Gísli sagði að þótt parið hefði mögulega sagt nágrannakonu og dóttur frá því að ferðalagið væri til Spánar en ekki Íslands þá væri ekki hægt að fullyrða að konan hefði gerst sek um fíkniefnaflutning.

Þá væri 500 kílómetra krókurinn til Belgíu ekki mikill krókur á evrópskan mælikvarða þar sem hámarkshraði er meiri. Maðurinn væri vanur að aka 600-700 kílómetra á dag. Þau höfðu auk þess tvo sólarhringa til að koma sér til Danmerkur en ökutími þangað væri áætlaður sjö og hálfur klukkutími. Því væri ekkert óeðlilegt við að fara til Belgíu. Þá væri framburður um hvort einhver frændi hefði verið heimsóttur eða ekki algjört aukaatriði í málinu. 

Fimm ára dómur hæfilegur

Ekki væri óeðlilegt að maðurinn hefði náð að skreppa út úr verslunarmiðstöðinni og hitt skipuleggjendur án þess að konan setti spurningamerki við það. Pör héldust ekki alltaf í hendur í langri heimsókn í verslunarmiðstöð. 

Auk þess væri ekki eins og maðurinn hefði þurft að fela dósirnar lengi fyrir konu sinni. Um einhverjar mínútur hefðu verið að ræða, þ.e. þegar ekið var úr verslunarmiðstöðinni og á hótel að kvöldi og svo að morgni þegar ekið var frá hóteli í verslun þar sem matarinnkaup fóru fram.

Gísli sagði frásögn þeirra að vissu leyti ruglingslega en þó ekki ótrúverðuga. Þá hefði maðurinn ekki verið meðvitaður um magn fíkniefnanna. Hafa verði í hug að maðurinn var fórnarlamb hótana og refsiramminn í málaflokknum sé skrýtinn. Hvað eigi að vera eftir fyrir skipuleggjendur þegar þeir nást og hljóta dóm? Taldi hann eðlilegt að maðurinn fengi fimm ára dóm fyrir brot sitt sem hann hafi játað frá fyrsta degi.

Engar sannanir gegn konunni

Guðmundur St. Ragnarsson, verjandi konunnar, tók undir með Gísla að öllu leyti í sínum málflutningi og krafðist þess að konan yrði sýknuð í málinu . Engin bein eða óbein sönnunargögn væru komin fram. Útskýringar dóttur um að hún hafi verið hrædd þegar lögregla ræddi við hana og svo ekki þorað að leiðrétta framburð sinn varðandi Spánarferð væri skiljanleg. Auk þess skipti frásögn um Spánarferð ekki máli enda sannað hún ekki neitt.

Ekki hefði verið sýnt fram á nein samskipti konunnar við skipuleggjendur. Hvorki með sms, símtölum eða tölvupósti. Málið hafi legið ljóst fyrir frá upphafi og hefði mátt einfalda alla meðferð þess og gefa út ákæru fyrr enda ljóst að engin sönnunargögn væru sem sýndu fram á sekt konunnar. Engin lífsýni eða fingraför hefðu fundist sem skiptu máli.

Þá gagnrýndi Guðmundur að lögregla hefði ekki reynt að fylgja þeim eftir og setja upp tálbeituaðgerð. Tollgæslan hefði farið beint í að tæma bílinn. Ekki hefðu fengist nein gögn frá Belgíu eins og upptökur úr eftirlitsmyndavélum við verslunarmiðstöðina eða verslunina þar sem matvælin voru keypt daginn eftir. Einnig væri gagnrýnisvert að upplýsingar um hlerunaraðgerð lögreglu á Litla-Hrauni hefði ekki ratað í gögn málsins og þannig verið haldið leyndum fyrir ákærðu og verjendum.

Krafðist Guðmundur sýknu en til vara vægustu mögulegu refsingar yrði konan fundin sek. Reikna má með því að dómur verði kveðinn upp innan fjögurra vikna.