Eldur í gámi í Laugardal: „Heyrðum mikla sprengingu og sáum fjóra unga stráka hlaupa á brott“

Slökkviliðið á höfuðborgarsvæðinu þurfti að slökkva eld sem upp kom í blaðagámi nú undir kvöld við leikskólann Vinagarð sem stendur við Holtaveg í Reykjavík.

Heiðar Ingi Svansson, íbúi í Laugardal, segir að hann hafi verið á gangi ásamt konu sinni þegar þau hafi skyndilega heyrt mikla sprengingu. „Við vorum þarna í hvarfi, heyrðum mikla sprengingu og sáum svo fjóra unga stráka hlaupa á brott. Okkur fannst þetta meiri sprenging en kemur frá venjulegum Kínverjum. Strákarnir voru frekar ungir – ég myndi halda í kringum tíu ára eða eitthvað svoleiðis.“

Heiðar Ingi segir að þau hjónin hafi svo séð eldinn, en þá voru strákarnir búnir að hörfa. „Ég kallaði á þá, en þeir voru hins vegar það langt í burtu. Annars hefði ég getað hlaupið þá uppi.“

Þau hringdu svo í 112 og tilkynntu slökkvilið um eldinn. „Þetta er náttúrulega stórhættulegt. það er mjög mikilvægt fyrir okkur foreldra að hafa eftirlit með flugeldum og meðferð barna á þeim.“

Hann segir að lögreglumenn sem mættu á svæðið hafi greint þeim hjónum frá því að tilvik sem þessi hafi verið mun færri á þessu ári, borið saman við síðustu ár.

„Mér skilst að starfsmenn Sorpu hafi verið duglegir að tæma gámana dagana fyrir og eftir gamlársdag. Nú hafa gámarnir því væntanlega verið hálftómir og því sjálfsagt ekki eins spennandi að kveikja í,“ segir Heiðar Ingi.