Óður til íslenskra bifvélavirkja

Íslenskur bílaáhugamaður hefur undanfarin þrjú ár tekið yfir fimmtán hundruð myndir af hinu ýmsu bílum sem hafa verið gerðir upp hér á landi. Afraksturinn birtir hann svo á Instagram þar sem næstu þrjátíu þúsund manns fylgjast með. Hann segir myndirnar vera óð til íslenskra bifvélavirkja og hugvitsmanna. 

Gylfi Blöndal hefur undanfarin þrjú ár haldið úti Instagramsíðunni Iceland Car Culture, þar sem hann deilir myndum af gömlum uppgerðum bílum. Hann segir bílaáhugann hafa kviknað á uppvaxtarárunum í ferjubænum Seyðisfirði.

„Sem krakki og unglingur vann ég við að dæla bensíni á bíla þarna. Þá sá ég alla gömlu flottu bílana vera að fara inn og út úr landinu. Þá serstaklega svona gamla ferðabíla, mikið breytta bíla og bíla sem fólk getur búið í. Þá hugsaði ég með mér að einhvern daginn ætlaði ég að eignast svona bíl,“ segir Gylfi.

Hann á nú sjálfur tvo uppgerða bíla sem hann er duglegur að ferðast í um landið. Þegar sá draumur hafði ræst fór hann að taka myndir af öðrum ökutækjum sem vöktu athygli hans.

„Ég hef áhuga líka á að varðveita eitthvað af heimildum um þessa skrítnu bíla sem eru að fara að hverfa af vettvangi á nýrri bílaöld. Það dreif mig áfram í þessu, en líka bara minn persónulegi áhugi. Áhuginn sem ég hef fundið að utan hefur eiginlega bara komið mér á óvart.“

Yfir 26.000 fylgjendur á Instagram

Yfir tuttugu og sex þúsund manns fylgja Gylfa á Instagram, en hvar finnur hann alla þessa bíla?

„Ég leita að bílum. Þetta rennur ekkert í innkeyrsluna hjá manni af sjálfsdáðum. Oft þarf að hafa svolítið mikið fyrir að finna bestu bílana. Stundum finn ég þá í myrkri og þarf að koma aftur seinna, og þá er hann kannski farinn. Þá þarf ég að koma aftur og þá er hann kannski kominn aftur og birtan rétt. Þetta er svolítið veiði. Ég þarf að veiða þá. Nú er ég búin að mynda hátt í fimmtán hundruð bíla svo þetta er orðið ágætis safn.“

Gylfi segist líta á bílamyndirnar sem mikilvæga heimildaöflun. 

„Á vissan máta má í raun segja að þetta sé hálfgerður óður til íslenskra bifvélavirkja og hugvitsmanna. Og á vissan hátt er þetta líka svona „icelandic design“. Ef ég finn bílinn og finn eigandann nálægt þá reyni ég alltaf að tala við hann og fá einhverjar frekari upplýsingar og skemmtilegar sögur sem ég reyni að deila svo áfram með mínum fylgjendum á Instagram.“