Abe heimsækir Pearl Harbor á Hawaii

Shinzo Abe, forsætisráðherra Japans, er nú staddur í opinberri heimsókn á Hawaii og hefur hann heimsótt nokkra minnisvarða á eyjunum.

Hann mun síðan, í fylgd með Barack Obama Bandaríkjaforseta, heimsækja Pearl Harbor, en sú heimsókn þykir söguleg í meira lagi því það var þar sem Japanir drógu Bandaríkin inn í seinni heimsstyrjöldina með því að ráðast á flotastöð þeirra þann 7. desember 1941.

Þetta er í fyrsta sinn frá árásinni sem leiðtogar beggja landa heimsækja hinn örlagaríka stað.

Fyrr á árinu heimsótti Obama japönsku borgina Hiroshima þar sem Bandaríkjaher varpaði kjarnorkusprengju í ágúst 1945.