Hættulegustu horn deildarinnar skiluðu Hilmari Árna stoðsendingatitlinum

Hilmar Árni Halldórsson, miðjumaður Stjörnunnar, var sá leikmaður í Pepsi-deild karla sem lagði upp flest mörk fyrir félaga sína á nýloknu tímabili. Hilmar Árni hafði talsverða yfirburði í sumar en hann gaf þremur stoðsendingum meira en næstu menn.

Sumarið á undan var Hilmar Árni efstur á listanum fram eftir sumri en missti síðan stoðsendingatitilinn til Blikans Kristins Jónssonar á lokasprettinum. Að þessu sinni var það góð seinni umferð sem tryggði Hilmari stoðsendingatitilinn.

Líka markahæstur í Stjörnunni

Hilmar Árni, sem er 24 ára gamall, var ekki aðeins stoðsendingahæstur í deildinni heldur var kappinn einnig markahæstur í markahæsta liði deildarinnar. Hilmar Árni skoraði sjálfur 7 af 43 mörkum Garðabæjarliðsins í sumar.

Hilmar Árni gerði því flotta hluti á sínu fyrsta tímabili með Stjörnunni en hann þurfti samt tíma til að læra inn á nýju liðsfélagana. Fyrsta stoðsendingin hans kom ekki fyrr en í 11. umferðinni eða um miðjan júlí. Hilmar Árni lagði þá upp tvö mörk og átti stóran þátt í undirbúningi þess þriðja í sigri Stjörnumanna í Ólafsvík.

Fjölnismenn efstir framan af

Fjölnismaðurinn Martin Lund Pedersen var með forystuna um mitt mót en hann hins vegar gaf sína fimmtu og síðustu stoðsendingu í tólftu umferð.

Annar leikmaður Grafarvogsliðsins, Gunnar Már Guðmundsson, hafði komist upp fyrir Martin Lund og verið með forystu frá og með 14. umferðinni. Gunnar Már gaf hins vegar síðustu stoðsendingu sína á tímabilinu í byrjun ágúst. Þetta varð því endasleppt hjá Fjölnismönnunum hvað varðar stoðsendingarnar og sigur Hilmars Árna var því frekar öruggur.

Hilmar Árni tók forystuna með því að leggja upp tvö mörk í Vestmannaeyjum í 19. umferðinni og hélt henni eftir það. Hilmar gaf á endanum þremur fleiri stoðsendingar en Fjölnismaðurinn Gunnar Már Guðmundsson og liðsfélagi Hilmars hjá Stjörnunni, Guðjón Baldvinsson.

Guðjón gaf tvær stoðsendingar í lokaumferðinni og hoppaði upp í annað sætið við hlið Gunnars

Hilmar Árni gaf flestar stoðsendingar á þá Daníel Laxdal, Guðjón Baldvinsson og Baldur Sigurðsson eða tvær á hvern. Hann lagði líka upp eitt mark fyrir þá Grétar Sigfinn Sigurðarson og Hólmbert Aron Friðjónsson og svo eitt sjálfsmark.

Hornspyrnur Hilmars Árna eru að skila honum stoðsendingatitlinum. Hann gaf sex af átta stoðsendingum sínum úr hornspyrnum í fyrra og að þessu sinni komu sex af níu stoðsendingum hans úr hornspyrnum. Hilmar Árni átti einnig eina stoðsendingu úr aukaspyrnu og var því heldur betur ógnandi í föstu leikatriðum Stjörnumanna í sumar.

Tólf stoðsendingar úr hornum

Hilmar Árni hefur því alls gefið tólf stoðsendingar úr hornspyrnum á undanförnum tveimur tímabilum. Hann er jafnframt kominn með 17 stoðsendingar í fyrstu 42 leikjum sínum í efstu deild.

Hilmar Árni vann ekki bara stoðsendingarnar því hann var einnig sá leikmaður sem kom að undirbúningi flestra marka með því annaðhvort að gefa stoðsendingu eða hjálparsendingu. Hjálparsending er sending sem er ekki síðasta sending (stoðsending) en á mikinn þátt í aðdraganda marksins.

Hilmar Árni fékk meiri samkeppni á þeim lista en hann átti þátt í undirbúningi þrettán marka eða einu meira en hægri bakvörður FH-liðsins, Jonathan Hendrickx.

Flestar stoðsendingar í Pepsi-deild karla 2016:

Hilmar Árni Halldórsson, Stjarnan - 9

Gunnar Már Guðmundsson, Fjölnir - 6

Guðjón Baldvinsson, Stjarnan - 6

Martin Lund Pedersen, Fjölnir - 5

Sigurður Egill Lárusson, Valur - 5

Jonathan Hendrickx, FH - 5

Halldór Orri Björnsson, Stjarnan - 5

Morten Beck, KR - 5

Gary John Martin, Víkingur R. - 4

Pablo Oshan Punyed, ÍBV - 4

Kristinn Freyr Sigurðsson, Valur  -   4

Óskar Örn Hauksson, KR   -  4

Árni Vilhjálmsson, Breiðablik   -  4

Arnþór Ari Atlason, Breiðablik   -  4

Ívar Örn Jónsson, Víkingur R.   -  4

Atli Guðnason, FH - 4

Tryggvi Hrafn Haraldsson, ÍA - 4

Þórir Guðjónsson, Fjölnir  -    4

Andri Adolphsson, Valur  -    4

Vilhjálmur Pálmason, Þróttur   -  4

Marcus Solberg Mathiasen, Fjölnir - 4

Bjarni Ólafur Eiríksson, Valur - 4

Denis Fazlagic, KR - 4

Kristinn Ingi Halldórsson, Valur  -   4

Ævar Ingi Jóhannesson (Stjarnan), Birnir Snær Ingason, Viðar Ari Jónsson (Fjölnir), Andrés Már Jóhannesson, Víðir Þorvarðarson (Fylkir), Pálmi Rafn Pálmason, Finnur Orri Margeirsson (KR), William Da Silva (Víkingur Ó.), Þórarinn Ingi Valdimarsson, (FH), Mikkel Maigaard, Simon Smidt (ÍBV), Vladimir Tufegdzic, Alex Freyr Hilmarsson  (Víkingur R.), Andri Rafn Yeoman (Breiðablik), Dion Jeremy Acoff, (Þróttur), Þórður Þ. Þórðarson,  Hallur Flosason (ÍA)  allir með 3 stoðsendingar.