Konur leggja niður störf og krefjast jafnréttis

Þann 24. október 1975 fóru stærstu fjöldamótmæli Íslandssögunnar fram þegar konur um allt land lögðu niður störf um miðjan dag til að mótmæla kynbundnum launamun.

Talið er að 25 þúsund konur hafi hópast saman í miðbæ Reykjavíkur á samstöðufundi til að mótmæla því að laun kvenna væru umtalsvert lægri en laun karla.

Tíu árum síðar, þegar leikurinn var endurtekinn, söfnuðust saman átján þúsund manns og sýndu samstöðu á Lækjartorgi en í millitíðinni hafði Kvennalistinn verið stofnaður og Vigdís Finnbogadóttir hlotið kjör sem forseti, fyrst kvenna í heiminum.

Í dag hefur aftur verið boðað til kvennafrídags eða kvennaverkfalls undir slagorðinu Kjarajafnrétti strax. Ný launakönnun VR sýnir að óútskýrður launamunur kynjanna er tíu prósent.

Samkvæmt frétt Hagstofunnar frá 2014 var óleiðréttur launamunur kynjanna á Íslandi 18,3 prósent og hafði minnkað um rúmt prósent frá árinu áður.

Konur eru hvattar til að leggja niður vinnu klukkan 14.38 í dag og sameinast á Austurvelli á baráttufundi. Leikskólar borgarinnar hafa sömuleiðis hvatt foreldra til að sækja börn sín svo leikskólastarfsmenn geti tekið þátt í viðburðinum.

Í dagblaðinu Tímanum frá 26. október 1975 má finna myndaþátt af feðrum sem neyddust til að taka börn sín með í vinnuna þegar konur lögðu niður störf.

Fyrirsögn greinarinnar er „Almenn þátttaka í dömufríinu“ en hvergi er minnst á ástæður þess að konur lögðu niður störf. Þar kemur fram að bankastjórar Landsbankans hafi neyðst til að sjá sjálfir um afgreiðslustörf þegar konurnar gengu út.

Þá hafi karlkyns starfsmenn Landsbankans við Laugaveg 77 gripið til þess að veifa hvítum fána, til tákns um uppgjöf, þegar konurnar lögðu niður störf þar sem konur skipuðu mikinn meirihluta starfsliðsins.

Hjá Ríkissjónvarpinu þurftu karlkyns starfsmenn að passa börnin sem fylgdu feðrum sínum í vinnuna og það var enginn annar en Ómar Ragnarsson skemmtikraftur sem hafði ofan af fyrir börnunum.

Fréttin birtist fyrst í Fréttablaðinu.