„Nagladekk í dag ekki eins og nagladekk í gamla daga“

Það fer alfarið eftir því hvert er verið að keyra hvort æskilegt sé að vera á nagladekkjum eða ekki á höfuðborgarsvæðinu mati sérfræðings í umferðaröryggi.

Reykjavíkurborg sendi í dag frá sér tilkynningu þar sem íbúar borgarinnar voru hvattir til þess að nota ekki nagladekk. Í tilkynningunni kom raunar fram að nagladekk væru ekki æskileg þar sem þau spæni upp malbikið og auki þar með á kostnað borgarinnar vegna viðhalds gatna.

Þessu eru Ólafur Guðmundsson, umferðaröryggissérfræðingur hjá FÍB, ekki sammála. Hann segir að mikil þróun hafi orðið í nagladekkjum síðustu ár. Þar auki sé það gerð malbiksins, ekki dekkin, sem eigi stærri hluta í því að svokölluð hjólför myndist.

„Þau gera það ekki vegna þess að malbikið hér er mýkra, það er mýkra grjót í þvi. Rásirnar eru ekki bara út af sliti frá dekkjum heldur vegna þess að malbikið er svo þunnt. Það sígur bara,“ segir Ólafur sem segir að 10-15 prósent af sliti gatna sé að völdum nagladekkja.

„Svo skal líka hafa í huga að nagladekk í dag eru ekki eins og nagladekk í gamla daga. Það eru færri naglar í dekkjunum, þau eru léttari og í mörgum tilfellum minni,“ segir Ólafur.

Ólafur segir að þeir sem keyri einungis um í Reykjavík þurfi líklega ekki að vera á nagladekkjum, en fyrir þá sem fara reglulega úr bænum, geti fátt komið í stað nagladekkjanna.

„Þeir sem keyra minna og meira bara innanbæjar hafa að mínu viti ekkert að gera með nagladekk. Vera með góð vetrardekk og passa að þau séu ekki slitin,“ segir Ólafur.

„Ef að menn eru að fara úr bænum, bústaðaferðir fyrir austan eða eru að fara oft yfir Hellisheiði kemur hins vegar ekkert í stað nagla.“