Son tryggði Spurs sigur í Moskvu

Suður-Kóreumaðurinn Son Heung-Min tryggði Tottenham Hotspur sterkan útisigur á CSKA Moskvu í E-riðli Meistaradeildar Evrópu í kvöld.

Son skoraði bæði mörk Tottenham í 1-2 sigri á Middlesbrough í ensku úrvalsdeildinni á laugardaginn og hann var aftur á skotskónum í Moskvu í kvöld.

Son skoraði eina mark leiksins á 71. mínútu eftir stungusendingu Eriks Lamela. Suður-Kóreumaðurinn var á mörkunum á að vera rangstæður en markið stóð.

Tottenham er nú komið með þrjú stig í E-riðli en liðið tapaði fyrir Monaco í 1. umferð riðlakeppninnar.