Lögregla elti mann sem var undir áhrifum á stolnum bíl

Eins og gefur að skilja var í nógu að snúast hjá Lögreglunni á höfuðborgarsvæðinu í gær en 131 mál var skráð á dagbók lögreglu. Talið er að á um annað hundrað þúsund manns hafi sótt viðburði Menningarnætur.

Rétt fyrir um klukkan þrjú í nótt hóf lögregla eftirför á bifreið sem neitaði að stoppa eftir að lögregla hafði beint bílnum upp að Snorrabraut frá Sæbraut. Til allrar lukku varð eftirförin ekki ýkja löng því ökumaður bifreiðarinnar ók upp á kantstein á horni Sæbrautar og Kirkjusands.

Bílinn skemmdist töluvert við áreksturinn og voru mennirnir tveir sem í bílnum voru handteknir. Í ljós kom að bílinn var stolinn en auk þess er ökumaður grunaður um að hafa keyrt undir áhrifum fíkniefna. Hann var sviptur ökuleyfi á staðnum. Mennirnir voru báðir vistaðir í fangageymslu fyrir rannsókn málsins.

Dráttabifreið þurfti til þess að flytja bílinn á brott.

Mikil unglingadrykkja

Flest málin í gær voru þó tengd ölvun og hávaða en 11 einstaklingar gistu fangageymslur í nótt. Nokkuð var um það að lögregla hafði afskipti af drukknum unglingum sem ekki höfðu aldur til áfengisneyslu. Nokkrir voru teknir fyrir ölvunarakstur en tveir voru handteknir grunaðir um líkamsárás.