Hoppandi heilbrigðisráðherra á Hvolsvelli

Kristján Þór Júlíusson heilbrigðisráðherra þurfti að hoppa og taka vel á því á skóflunni þegar hann tók fyrstu skóflustunguna að nýrri viðbyggingu við dvalar- og hjúkrunarheimilið Kirkjuhvol á Hvolsvelli í dag.

Ólöf Guðbjörg Eggertsdóttir hjúkrunarforstjóri á Kirkjuhvoli og Lilja Einarsdóttir oddviti Rangárþings eystra tóku líka skóflustungu með ráðherranum. Með nýju viðbyggingunni bætast við tólf ný herbergi á Kirkjuhvoli en fyrir eru þar 3 dvalarrými, 25 hjúkrunarrými og 2 dagvistunarrými.

Kostnaður við bygginguna verður um 512 milljónir króna og hefur verið samið við verktakafyrirtækið JÁVERK á Selfossi um framkvæmd verksins. Nýja viðbyggingin verður tekin í notkun 19. apríl 2018.

Rangárþing eystra fékk úthlutað 202 milljónum úr Framkvæmdasjóði aldraðra sem hluti af fjármögnun byggingarinnar sem verður 1.305 fermetrar að stærð.