Tala látinna hækkar enn

Írösk yfirvöld hafa hækkað tölu látinna í sjálfsmorðssprengjuárásinni í Bagdad. Á fimmtudag höfðu 250 látið lífið vegna hennar en í dag voru þeir 281. Þetta kemur fram á vef BBC.

Hryðjuverkasamtökin sem kenna sig við íslamskt ríki lýstu yfir ábyrgð á árásinni. Þetta er mannskæðasta árás í landinu frá því að innrás Bandaríkjanna, árið 2003, hófst.

Fyrir tveimur árum náðu hersveitir Íslamska ríkisins bæjum og borgum í norðurhluta landsins á sitt vald en á síðustu vikum og mánuðum hafa stjórnarhermenn náð stærstum hluta þess landsvæðis til baka á nýjan leik.

Sprengjan sprakk síðastliðinn sunnudag fyrir utan verslunarmiðstöð á síðasta degi Ramadan. Fólk hafði safnast saman til að fagna því að föstumánuðurinn hafði runnið sitt skeið.