Frank de Boer hættur hjá Ajax

Frank de Boer verður ekki áfram þjálfari hollenska stórliðsins Ajax en hann hefur ákveðið að hætta með liðið eftir sex ára starf.

Ajax missti af hollenska titlinum til PSV Eindhoven annað árið í röð en nú eftir dramatíska lokaumferð um síðustu helgi.

„Ég fór að átta mig á því að það er kominn tími á eitthvað annað," sagði hinn 45 ára gamli Frank de Boer en BBC segir frá.

Frank de Boer gerði Ajax að hollenskum meisturum fjögur ár í röð frá 2011 til 2014 og á þremur þeirra var íslenski landsliðsframherjinn Kolbeinn Sigþórsson í stóru hlutverki í sóknarleik liðsins.

Ajax þurfti „bara" að vinna eitt af botnliðunum, De Graafschap, í lokaumferðinni til þess að tryggja sér sinn fimmta titil á síðustu sex árum en náði aðeins 1-1 jafntefli.

PSV Eindhoven vann PEC Zwolle á sama tíma og tryggði sér hollenska meistaratitilinn annað árið í röð.

„Þetta var okkar eigin sök. Við vorum með þetta í okkar höndum," sagði svekktur Frank de Boer eftir leikinn.

Edwin van der Sar, yfirmaður hjá Ajax og fyrrum markvörður Manchester United, tjáði sig um brotthvarf Frank de Boer.  „Okkur þykir það leiðinlegt að hann sé að fara. Hann er afar metnaðarfullur og enginn veit enn hvað hann ætlar að gera. Við óskum honum hinsvegar alls hins besta," sagði Van der Sar.

Frank de Boer hefur verið orðaður við ensku úrvalsdeildina og þá sérstaklega lið Everton. Everton er í 12. sæti og það þykir líklegt að Roberto Martinez hætti með liðið eftir tímabilið.