Nýir tímar á gömlum grunni

Brýn verkefni bíða næstu ríkisstjórnar: Gjaldfrjáls heilbrigðisþjónusta, aukin hlutdeild almennings í auðlindaarðinum, ný stjórnarskrá, jafnrétti til náms, úrbætur í húsnæðismálum og efling atvinnulífs sem skapar fjölbreytt störf fyrir fólk sem flýr nú land. Um þessi verkefni getur stjórnarandstaðan sameinast og myndað bandalag fyrir næstu kosningar. Við erum sammála um brýnustu verkefnin. Næstu kosningar snúast um valið milli sérhagsmuna og almannahagsmuna. Íhald eða umbætur. Kyrrstöðu eða framþróun.

Fyrir sextán árum sameinaðist fólk um grunngildin, um aukinn jöfnuð, lýðræðisumbætur, femínisma og frjálslyndi. Verkefnið sem þá hófst var kennt við samfylkingu. Nú þarf að stilla saman strengi þessara afla á nýjan leik og skapa valkost við hægri-íhaldsstjórn. Á grundvelli samvinnu eigum við að stækka hópinn og ná betri árangri.

Stjórnmálaflokkar eiga að vera í sífelldri þróun. Nútímaleg hreyfing á að vera hópur fólks sem er sammála um grunngildi en notar opna og lýðræðislega farvegi til samtals og ákvarðanatöku. Samskiptamiðlar og flæði upplýsinga opna fyrir betri tengsl grasrótar og þingmanna. Þannig opnast sífellt fleiri möguleikar til að nýta visku fjöldans til ákvarðanatöku.

Þá eiga stjórnmálahreyfingar að opna sig betur fyrir almenningi. Skrifstofa stjórnmálahreyfingarinnar á að vera á jarðhæð við fjölfarna götu þar sem er vítt til veggja og hátt til lofts. Dýnamískt umhverfi með kaffihúsi og félagsmiðstöð. Einhvers konar nýsköpunarhús stjórnmálanna. Neistaflug og nýjungar. Stjórnmálahreyfingar mega ekki staðna heldur eiga þær sífellt að leitast við að ná sem bestu sambandi við almenning.

Ég vil að jafnaðar- og félagshyggjufólk horfi til framtíðar og marki sér nýtt upphaf á nýjum forsendum. Þannig megi laða að nýtt fólk með hugmyndir. Ég hef talað fyrir nýju nafni á endurnýjaðri hreyfingu. Það er ekki aðalatriðið en er eðlilegur og sjálfsagður hluti engu að síður. Það sendir skýr skilaboð til umhverfisins og til okkar sjálfra um að við ætlum okkur að byrja á nýjum stað. Stjórnmálahreyfing jafnaðar- og félagshyggjufólks mun ætíð vera til. Nú tel ég tímabært að gera breytingar á starfi hennar og þróa hana áfram.

 

Þessi grein birtist fyrst í Fréttablaðinu.