Benitez gerði þriggja ára samning

Rafael Benitez hefur verið ráðinn knattspyrnustjóri enska úrvalsdeildarfélagsins Newcastle. Félagið staðfesti það nú síðdegis.

Benitez tekur við starfinu af Steve McClaren sem var rekinn nú fyrr í morgun. Newcastle er í næstneðsta sæti deildarinnar en hefur nú tíu leiki til að bjarga sæti sínu í deildinni.

Benitez skrifaði undir þriggja ára samning við Newcastle en samkvæmt heimildum Sky Sports getur hann rift samningi sínum við félagið ef það fellur úr ensku úrvalsdeildinni í vor.

Það verða þó nokkrar breytingar á þjálfara liði félagsins en þeir Fabio Pecchia, Francisco de Miguel Moreno og Antonio Gomez Perez fylgja allir Benitez til Newcastle.

Benitez verður áttundi stjóri Newcastle á aðeins tólf árum en hann var síðast á mála hjá Real Madrid. Hann hefur einnig stýrt Liverpool og Chelsea á ferli sínum.