Talið að sjaldgæf fló sé farin að breiða úr sér

Kattafló hefur greinst á fleiri köttum á höfuðborgarsvæðinu frá því hún greindist í febrúar. Hætt er við að flóin sé útbreiddari en talið hefur verið að mati Matvælastofnunar. Þó sé mögulegt að uppræta flóna en að til þess þurfi samstillt átak hunda- og kattaeigenda.

Stofnunin greindi frá því á vef sínum í febrúar að sjaldgæf tegund af fló hefði greinst á ketti á höfuðborgarsvæðinu. Sú tegund hefur örsjaldan fundist hér á landi og hefur ekki verið talin landlæg. Því var farið í það að leita að slíkum flóm og var þeim tilmælum beint til dýralækna að vera vakandi fyrir flóm á köttum og hundum sem komð væri með til þeirra.

Sjá einnig:Óværa sem smitar bæði menn og dýr

Tilkynning um grun barst í síðustu viku frá Dýralæknastofu Dagfinns, sem svo var staðfestur á tilraunastöð Háskóla Íslands. Um var að ræða kött af heimili í miðborg Reykjavíkur, sem fer út að villd. Þegar málið var kannað kom í ljós að eigandi hans hafði farið með hann til dýralæknis oftar en einu sinni á síðasta ári m.a. vegna kláða og annarra einkenna. Kötturinn fékk meðhöndlun gegn flóm þar sem þetta var á þeim tíma sem fuglaflærnar eru á kreiki. Í ljósi greiningarinnar nú er talið að líklegt að hann hafi verið með flær um töluverðan tíma. Af þessu má sjá hversu erfitt getur reynst að finna flærnar og losna við þær.

Matvælastofnun telur þetta tilfelli gefa til kynna að hugsanlega sé kattaflóin orðin útbreidd meðal katta, og ef vil vill hunda. Til að kanna útbreiðsluna hefur Matvælastofnun nú beint þeim tilmælum til dýralækna að þeir taki sýni af öllum köttum og hundum á tímabilinu frá 14. – 28. mars, sem komið er með til þeirra og eru með einkenni í húð. Tilraunastöð Háskóla Íslands að Keldum mun taka við sýnunum og kanna hvort í þeim leynast kattaflær.