Óværa sem smitar bæði menn og dýr

Matvælastofnun (MAST) leggur þunga áherslu á að upplýsa uppruna og mögulega dreifingu kattaflóar sem greindist á ketti í Garðabæ fyrir skemmstu. Um heimiliskött er að ræða og því enn ekkert vitað um uppruna smitsins.

Kattafló er enginn aufúsugestur enda getur hún valdið bæði dýrum og mönnum miklum óþægindum og jafnvel veikindum. Matvælastofnun hvetur fólk til að vera á varðbergi gagnvart þessari óværu og leggur mikla áherslu á að reynt verði að uppræta hana.

Dýralæknar á Dýraspítalanum í Garðabæ fengu grun sinn um katta­flóna staðfestan á Tilraunastöð Háskóla Íslands að Keldum í síðustu viku og Matvælastofnun var tilkynnt um greininguna á mánudag.

Þóra J. Jónasdóttir, sérgreinalæknir hjá MAST, segir flóna lifa á hundum og köttum, en vissulega geti manneskja borið á milli flær í stuttan tíma í fatnaði. Flóin sé kvik og eigi auðvelt með að stökkva á milli hýsla. Sjaldgæft er að flóin beri bakteríur sem valda alvarlegum sjúkdómum í mönnum. Hins vegar eru dæmi þess og því mikilvægt að uppræta flóna strax eins og tekist hefur áður – á hundum á árunum 1980 og 1984 og á innfluttum dýrum í einangrun í Einangrunarstöðinni í Reykjanesbæ árin 2012 og 2013.

Þóra hvetur til þess að kattaeigendur og aðrir séu vakandi og skoði dýrin sín jafnvel sérstaklega núna. „Þetta er sníkjudýr sem við viljum alls ekki fá inn í landið, og full ástæða er til að fólk taki þetta tilvik alvarlega. Sérstaklega þar sem smitleiðirnar eru ekki enn þekktar,“ segir Þóra og vísar á upplýsingar á heimasíðu stofnunarinnar. Þar má finna upplýsingar sem geta hjálpað við greiningu, og það hjálpar að fuglaflóin er almennt ekki mikið á kreiki á þessum árstíma þannig að ef maður sér eitthvað kvikt í feldi er rétt að láta dýralækni skoða dýrið.

Þó flóin sé ekki landlæg hér á landi, þá er hún það í Bretlandi, í Bandaríkjunum og víða í Evrópu. Eins hafa komið upp tilfelli á Norðurlöndunum. Þóra bendir á að þrátt fyrir að sníkjudýrameðhöndlunar gæludýra sé krafist áður en þau eru flutt inn til landsins þá hefur komið upp fjöldi tilfella þar sem bæði inn- og útvortis sníkjudýr hafa greinst hjá dýrum í Einangrunarstöðinni og þannig verið hægt að uppræta smitið strax. Sum þeirra sníkjudýra geta bæði smitað menn og dýr.

„Þau tilfelli undirstrika mikilvægi stöðvarinnar til að standa vörð um þá sérstöðu Íslands að vera að miklu leyti laust við þennan ófögnuð,“ segir Þóra.