Jóhann sá gult í grátlegu tapi

Jóhann Berg Guðmundsson og félagar í Charlton þurftu að sætta sig við grátlegt 3-4 tap gegn Reading í dag í ensku Championship-deildinni en sigurmark Reading kom á 92. mínútu leiksins.

Reading leiddi 3-1 í hálfleik en Yaya Sanogo, lánsmaður frá Arsenal, kom Charlton aftur inn í leikinn og fullkomnaði þrennuna á 84. mínútu leiksins.

Leikmönnum Reading tókst þó að bæta við fjórða markinu á 92. mínútu en þar var að verki lettneski framherjinn Deniss Rakels. Charlton situr því áfram í botnsæti Championship-deildarinnar þegar tólf umferðir eru eftir.

Aron Einar Gunnarsson, landsliðsfyrirliðinn, lék allar 90. mínúturnar í 2-1 sigri Cardiff á Preston í dag en Anthony Pilkington skoraði bæði mörk Cardiff af vítapunktinum.

Björn Bergmann Sigurðarson lék allar 90. mínúturnar en komst ekki á blað í 2-1 sigri Wolves á Derby í hádegisleiknum í dag en George Saville skoraði sigurmark á lokamínútum leiksins.

Þá lék Eggert Jónsson allar 90. mínútur leiksins í 2-1 sigri Fleetwood Town á útivelli gegn Coventry í dag en með sigrinum lyfti Fleetwood sér upp úr fallsæti.