Alfreð: Mótlætið hefur styrkt mig

Atvinnumannsferill landsliðsframherjans Alfreðs Finnbogasonar hefur verið nokkuð skrautlegur. Hann fór í atvinnumennsku fyrir fimm árum og er nú hjá sínu sjötta erlenda félagi.

Hann hóf atvinnumannsferilinn hjá Lokeren í Belgíu. Þar gekk ekki nógu vel og var hann því lánaður til Helsingborg í Svíþjóð þar sem hann sló í gegn. Fór hann í kjölfarið til Heeren­veen þar sem hann hélt áfram að slá í gegn. Alfreð varð markahæsti leikmaður hollensku úrvalsdeildarinnar og spænska félagið Real Sociedad keypti hann á milljarð.

Alfreð náði ekki að slá í gegn á Spáni og var lánaður til gríska félagsins Olympiacos fyrir tímabilið. Þar voru tækifærin aftur af skornum skammti. Hápunktur hans hjá liðinu var samt glæsilegur er hann tryggði sínum mönnum sigur gegn Arsenal á útivelli í Meistaradeildinni.

Þrátt fyrir það fékk hann lítið að spila með liðinu og úr varð að hann samdi við þýska félagið FC Augsburg á afmælisdegi sínum, 1. febrúar.

Búinn að prófa allt

„Ég á enn eftir að koma mér fyrir hérna. Ég er enn á hóteli en fæ húsnæði um helgina. Þá verður þetta allt þægilegra,“ segir Alfreð en hann var þá á leiðinni á æfingu með sínu nýja félagi.

„Það er allt svipað hérna og ég bjóst við. Gott og vinalegt fólk að vinna hjá félaginu og leikmennirnir flottir. Bærinn er í þægilegri stærð. Ég tel mig vera búinn að prófa allt núna eftir að hafa búið allt frá Heerenveen til Aþenu. Æfingaaðstaðan er flott og völlurinn góður. 30 þúsund manna völlur og alltaf fullt á honum. Það er ekki út á neitt að setja.“

Augsburg er búið að spila tvo leiki síðan Alfreð kom til félagsins. Hann spilaði síðustu 20 mínúturnar í 2-1 tapi gegn Ingolstadt en sat svo á bekknum allan tímann er liðið tapaði fyrir Bayern, 3-1.

„Það er aldrei það besta að koma inn í lið á miðju tímabili en það var eitthvað sem ég þurfti að gera. Ég veit vel að ég mun fá tækifæri hérna og er alveg rólegur þrátt fyrir bekkjarsetu í upphafi. Við erum að fara að spila sjö leiki á næstu þrem vikum og tveir af þeim eru Evrópuleikir sem ég get ekki spilað. Ég nýtist því vonandi í leikjunum í deildinni þess á milli. Auðvitað vil ég spila strax og ég stefni á að vera í liðinu um næstu helgi,“ segir Alfreð en það hefur reynt nokkuð á þolinmæðina hjá honum síðustu misseri.

„Þolinmæði er eitthvað sem er rosalega auðvelt að segja en mjög erfitt að framkvæma. Sérstaklega fyrir fótboltamann því maður vill alltaf spila. Ég var bara að koma hingað og liðið var á ágætis siglingu er ég kom. Ég er bjartsýnn á að spila stóra rullu hérna fljótlega. Ég er vissulega búinn að upplifa mikið síðustu 2-3 ár en ég hef borið mig vel. Ég hef alltaf mikið álit á mér sem fótboltamanni og sjálfstraust mitt byggist á mínu áliti en ekki annarra. Það er ákveðinn styrkleiki hjá mér. Ég viðurkenni alveg að það koma stundum lægðir þar sem maður er langt niðri en ég verð að vera fljótur að rífa mig upp. Tíminn hjá Olympiacos var mjög erfiður. Það skipti engu máli hvað ég gerði. Það breyttist ekki neitt. Það fór bara í bankann hjá mér. Mótlætið styrkir mig og þroskar.“

Vantar stöðugleika

Þó svo Alfreð hafi ekki spilað mikið í upphafi þá er hann silkislakur og sér fram á bjarta tíma hjá nýju félagi.

„Ég veit að þetta er ekki félag sem safnar leikmönnum án þess að nota þá. Þeir hafa haft áhuga á mér í tvö og hálft ár og vita allt um mig. Ég er bara að koma mér fyrir enn þá. Mér líður svipað núna og þegar ég kom til Heer­enveen. Ég væri til í að setjast hérna að í að minnsta kosti tvö ár. Mig vantar smá stöðugleika í ferilinn núna en maður veit samt aldrei í fótboltanum,“ segir Alfreð en hann hafði alltaf mikinn áhuga á að spila í Þýskalandi.

„Ég horfði mikið hingað er ég var í Hollandi. Það gekk ekki upp þá. Ég er mjög hrifinn af þessari deild og boltanum sem er spilaður hérna. Ég tel að hann geti hentað mér mjög vel. Nú verður bara að koma í ljós hvort það sé ekki rétt.“

Alfreð þarf á því að halda að spila eins og allir knattspyrnumenn. Svo er auðvitað EM næsta sumar og landsliðsmennirnir okkar vilja mæta þangað í toppstandi með sjálfstraustið í botni.

„Það er alltaf pressa í fótbolta, sama fyrir hvaða lið maður spilar. Auðvitað horfa menn mikið á EM enda einstakur atburður. Er menn munu horfa til baka á þann viðburð þá verður það klárlega einn af hápunktunum á ferli þeirra sem fara þangað.“

Í kvöld á liðið hans Alfreðs stórleik. Liverpool kemur í heimsókn í fyrri leik liðanna í 32-liða úrslitum Evrópudeildarinnar. Alfreð má ekki spila þar sem hann lék með Olympiacos í Meistaradeildinni.

„Það er ekki hægt að neita því að það er mjög fúlt að missa af þessum leik. Þetta er einn stærsti leikur í sögu félagsins enda er það í fyrsta skipti í Evrópudeildinni. Þetta er stór viðburður hérna. Líka af því að Jürgen Klopp er að koma í fyrsta skipti til Þýskalands.“