Verður Rashford eins og Nistelrooy eða Macheda?

Marcus Rashford, 18 ára gamall framherji Manchester United, stal fyrirsögnunum annan leikinn í röð þegar hann skoraði tvö mörk í 3-2 sigri United gegn Arsenal í stórleik helgarinnar í ensku úrvalsdeildinni.

Varla nokkur maður hafði heyrt um Rashford þegar hann kom óvænt inn í byrjunarliðið fyrir meiddan Anthony Martial í Evrópudeildinni gegn Midtjylland á fimmtudagskvöldið en þar skoraði hann einnig tvö mörk og bætti hann 51 árs gamalt met George Best.

Sjá einnig:Hver er þessi Rashford? | Sjáðu öll mörkin

Rashford er fjórtándi leikmaðurinn í sögu Manchester United sem skorar í sínum fyrsta leik í ensku úrvalsdeildinni frá stofnun hennar árið 1992.

Ekki hafa allir sem afrekuðu það slegið í gegn eins og kemur fram í skemmtilegri samantekt á vefsíðu Sky Sports í dag. Sumir urðu súperstjörnur og goðsagnir hjá liðinu en aðrir eru gleymdir.

Tvær goðsagnir

Fyrsti maðurinn sem skoraði í sínum fyrsta úrvalsdeildarleik fyrir Manchester United var Paul Scholes. Hann kom inn á fyrir Lee Sharpe í leik á móti Ipswich í september 1994 og skoraði.

Scholes átti eftir að spila 499 leiki í úrvalsdeildinni og skora 107 mörk næstu tvo áratugina og vinna deildina ellefu sinnum.

Sjá einnig:Rashford fer í efnafræðipróf á morgun

Hollenski markahrókurinn Ruud van Nistelrooy gerði eins og Rashford og skoraði tvö mörk í sínum fyrsta úrvalsdeildarleik. Það gerði hann í fyrstu leikviku árið 2001 eftir að hann var keyptur fyrir 19 milljónir punda frá PSV Eindhoeven.

Nistelrooy skoraði tvívegis á móti Fulham og átti eftir að verða einn besti framherji í sögu ensku úrvalsdeildarinnar. Hann skoraði í heildina 95 mörk í 150 leikjum og varð Englandsmeistari árið 2003.

Risamark en hvað svo?

Scholes var vissulega miðjumaður og Nistelrooy framherji sem var búinn að sanna sig í sterkri deild sem og í Meistaradeildinni áður en hann kom til Manchester United. Það dæmi sem er líkast Marcus Rashford er væntanlega Federico Macheda.

Macheda kom óvænt inn á sem varamaður í sínum fyrsta leik í apríl 2009 þegar Manchester United var í harðri titilbaráttu og sóttist eftir að vinna deildina þriðja árið í röð.

United var að gera 2-2 jafntefli við þá vel mannað lið Aston Villa þegar Ítalinn 18 ára gamli kom inn á og skoraði algjörlega magnað mark eftir snúning í teignum. Markið vann leikinn fyrir United og hjálpaði liðinu að vinna titilinn.

Ólíkt Scholes, Nistelrooy, Ole GunnarSolskjær, Gabriel Heinze og Louis Saha sem allir skoruðu í sínum fyrsta leik náði Macheda aldrei að fylgja markinu eftir. Hann fór á lán til Sampdoria, QPR, Doncaster og Birmingham áður en hann var á endanum látinn fara til Cardiff.

Nú er bara fyrir stuðningsmenn Manchester United að vona að Marcus Ashford líki eftir ferli Ruud van Nistelrooy frekar en Kiko Macheda.