Leicester án mikilvægs leikmanns í næstu tveimur leikjum

Toppliði Leicester City verður án eins síns mikilvægasta leikmanns í næstu tveimur leikjum sínum í ensku úrvalsdeildinni.

Miðjumaðurinn N'Golo Kante fór meiddur af velli í sigrinum á Norwich City um helgina eftir að hafa tognað aftan í læri. Nýjustu fréttir úr herbúðum Leicester eru þær að Frakkinn muni missa af leikjum liðsins á móti West Brom Albion annað kvöld og á móti Watford á laugardaginn kemur. Þetta kemur fram á Sky Sports.

N'Golo Kante er 24 ára gamall og á sínu fyrsta tímabili í ensku úrvalsdeildinni en hann kom til Leicester City frá Caen í ágúst. Kante hefur átt mjög gott tímabil og hefur náð vel góðri samvinnu með Daniel Drinkwater á miðju liðsins. Kante stoppar ófáar sóknir andstæðinganna og er lykilmaður í uppstillingu Ítalans Claudio Ranieri.

„Kante mun líklega missa af næstu tveimur leikjum. Ég vona að þetta verði bara tveir leikir. Hann finnur aðeins til aftan í læri en þetta hefur verið að plaga hann allt tímabilið. Ég vil því gefa honum smá hvíld," sagði Claudio Ranieri, knattspyrnustjóra Leicester City.

Meiðsli N'Golo Kante eru ekki í þeim fæti sem hann hefur verið að vandræðast með. Það lítur því út fyrir að hann hafi meiðst hinum megin af því að hann hefur verið að hlífa slæma fætinum.