Carragher svarar Diouf: Ég skoraði fleiri mörk en þú

El-Hadji Diouf virðist vera mjög í nöp við fyrrum samherja sína hjá Liverpool, Steven Gerrard og Jamie Carragher.

Í viðtali við fótboltatímaritið So Foot fór Diouf hörðum orðum um Gerrard og Carragher sem eru goðsagnir á Anfield Road. Í viðtalinu sagði Diouf m.a. að hann sjálfur sé heimsklassa leikmaður en Carragher drasl.

„Hann er svona skíthæll sem skrifar bók og minnist á mig endalaust. Hann fær ekki eina setningu um sig í minni bók því hann er algjör aumingi,“ segir Diouf í viðtalinu.

Carragher, sem starfar nú sem sparkspekingur á Sky Sports, skaut á Diouf á Twitter í gær og benti á að hann hafi skorað fleiri mörk fyrir Liverpool í ensku úrvalsdeildinni en Diouf, og þá væru sjálfsmörk ekki talin með.

The other big difference is he's scored less goals for LFC in the Premier League than me! (Not counting OG's!!) https://t.co/dwEA56c7NA

— Jamie Carragher (@Carra23) February 25, 2016

Carragher var aldrei mikill markaskorari og skoraði einungis fjögur mörk í 508 deildarleikjum fyrir Liverpool. Það er samt meira en Diouf sem gerði aðeins þrjú mörk í 55 deildarleikjum fyrir félagið, sem er skelfileg tölfræði fyrir framherja.

Diouf, sem var keyptur á 10 milljónir punda frá Lens 2002, lék aðeins tvö tímabil með Liverpool áður en hann var fyrst lánaður og svo seldur til Bolton Wanderers.

Diouf, sem er 35 ára, var síðast á mála hjá Sabah í Malasíu þar sem hann skoraði þrjú mörk í fjórum leikjum.