Taug strengd yfir hjólastíg í Kópavogi

Litlu munaði að illa hefði farið þegar hjólreiðafólk kom að þunnum kaðli sem strengdur hafði verið þvert yfir hjólastíg á Kársnesi í Kópavogi í gær. Strengurinn var í um eins metra hæð og kyrfilega bundinn við staur og girðingu.

Steinþóra Þórisdóttir lífeindafræðingur var í hjólatúr með börnum sínum þegar þau komu að tauginni. Hún segist rétt hafa náð að koma í veg fyrir að sonur hennar færi á strenginn. Veður- og birtuskilyrði hafi orðið til þess að hún sá hann.

„Ég var á frekar rólegri ferð þannig að ég sá strenginn nokkuð vel. Þetta var þunnur kaðall sem er hluti af kaðlagirðingu sem á að vernda hjólreiðafólk frá því að enda í fjörunni ef það missir jafnvægi,“ segir Steinþóra í samtali við Vísi. „Ef þú ert ekki á mjög hraðri siglingu eða ef það er ekki mjög dimmt þá er kaðallinn áberandi, en annars ekki. Þetta er mjög hættulegt.“

Aðspurð segist Steinþóra telja að taugin hafi verið strengd yfir stíginn í þeim tilgangi að valda slysi. „Það er svona fyrsta hugsun, þrátt fyrir að ég viti auðvitað ekki hver tilgangurinn með þessu var, það er voðalega erfitt að átta sig á því.“

Hún segir að lögreglu hafi verið gert viðvart í gegnum tölvuskeyti. Lögreglan í Kópavogi kannaðist þó ekki við málið þegar eftir því var leitað í morgun, en þau svör fengust að það yrði kannað.

Steinþóra birti færslu um málið á Facebook, en færsluna má lesa hér fyrir neðan.

STRENGUR ÞVERT YFIR HJÓLASTÍG:

Ég var að hjóla með börnunum mínum á Kársnesinu í kvöld kl.19.00 eða um það bil. Þegar við erum á leiðinni heim, hjólum frá undirgöngunum og í áttina út Kársnesið. Fyrir neðan tjaldstæðið tek ég eftir streng sem búið er að strengja þvert yfir hjólastíginn. Sem betur fer var bjart og maðurinn sem var nýbúinn að taka framúr mér sá hann líka. Mér tókst að stöðva son minn, en strengurinn náði honum í háls-hæð.

Við vorum í basli með að losa strenginn, það var búið að hnýta hann ansi fast við staurinn. En svo virðist sem kaðlagirðingin við hjólastíginn sem ætlað er að vernda hjólara frá því að lenda í fjörunni hafi verið eyðilögð og núna nýtt í þeim eina tilgangi að slasa næsta hjólara sem ekki sá strenginn.

Ég vil með þessu biðja ykkur um að hafa augun hjá ykkur þegar þið hjólið þarna. Ég reyndi að festa kaðalinn aftur við girðingarstaur en það er auðvelt að losa þetta aftur.