Vír strengdur yfir hjólabrú við Elliðaár

Hjólreiðamaður slasaðist eftir að hafa hjólað á vír sem strengdur hafði verið yfir nýju hjóla- og göngubrúna yfir Elliðarárósa síðdegis í gær. Sauma þurfti tíu spor á enni mannsins, er líklega tognaður á öxl og er hann verulega marinn og bólginn víðs vegar um líkamann. Honum er gert að vera frá vinnu í einhvern tíma vegna áverkanna.

Eiginkona mannsins vill ekki hugsa til þess hvernig hefði getað farið, einna helst ef börn hefðu verið þarna á ferð.

„Vírinn var strengdur í um það bil eins metra hæð frekar framarlega á brúnni og hann verður þess ekki var fyrr en hann er í loftinu. Vírinn var verulega öflugur stálvír sem fólk kannski er ekkert að bera með sér nema þá í vondum tilgangi,“ segir Jóhanna Pálsdóttir, eiginkona hjólreiðamannsins.

Málið hefur vakið mikla athygli á Facebook og hafa ýmsir haft samband við Jóhönnu vegna málsins. Þar á meðal tveir hlauparar sem segjast hafa séð starfsmenn við viðgerðir við brúna í gærmorgun.

„Við erum að velta því fyrir okkur hvort þeir hafi hugsanlega skilið eftir þennan vír, sem vissulega bíður hættunni heim. En það þarf verulega krafta til að binda vír svona vel,“ útskýrir Jóhanna.

Að sögn hennar er málið í rannsókn lögreglu.  „Við vitum ekki hvort það þýði eitthvað að kæra, en við ætlum að fara með þetta alla leið og viljum fylgja þessu eftir,“ segir Jóhanna að lokum.