Sá sem mætir Roger Federer í 2. umferð Wimbledon-mótsins var of þungur auli fyrir 3 árum

Íslenska karlalandsliðið í knattspyrnu kom heiminum í opna skjöldu með því að sigra lið Englands í sextán liða úrslitum Evrópumótsins í Frakklandi í gærkvöldi. Þetta var klassískur leikur litla liðsins gegn því stóra, Davíð gegn Golíat, en annað eins ævintýri átti sér stað í tennisheiminum.

Þar hefur 25 ára gamall Breti, Marcus Willis, haldið upp heiðri sinnar þjóðar á Wimbledon-mótinu í tennis. Willis er í 772. sæti heimslistans í tennis en hann vann Ricardas Berankis, Lithái sem er númer 53 á listanum, í fyrstu um ferð mótsins í gær.

Á morgun mun hann mæta Roger Federer, sjöföldum Wimbledon-meistara, í annarri umferð mótsins en Federer sat í þriðja sæti heimslistans fyrir mótið en Willis í 772. sæti listans. Breskir fjölmiðlar líkja þessu við ef breskt utandeildarlið í knattspyrnu myndi mæta Real Madrid í alvöru keppnisleik en Willis hefur sjálfur látið hafa eftir sér að hann hafi verið auli í yfirþyngd áður en hann fór að æfa tennis af einhverri alvöru fyrir þremur árum.

Willis, sem býr hjá foreldrum sínum, hefur unnið fyrir sér sem tenniskennari hjá Warwick Boat Club en hann þurfti að keppa vinna þrjár viðureignir í forumspili og aðrar þrjár í umspili bara til að komast inn á mótið.

Með því að komast í aðra umferð mótsins tryggði Willis sér 50 þúsund pund í verðlaunafé, sem nemur um 8,2 milljónum íslenskra króna miðað við gengi dagsins í dag, en þar áður hafði hann samtals unnið sér inn 72 þúsund pund, sem nemur um 11 milljónum íslenskra króna. Á þessu ári hafði hann aðeins tekið þátt á einu móti, Futures-mótinu í Túnis í janúar, þar sem hann vann sér inn um 270 pund, sem nemur um 44 þúsund krónum.

Federer hefur unnið 88 titla á sínum ferli, þar á meðal sautján sinnum á risamóti, og 98 milljónir dollara í vinningsfé, sem nemur um 12 milljörðum íslenskra króna miðað við gengi dagsins í dag.

Independent spurði Willis hvernig hann var fyrir þremur árum og var svarið einfalt:

„Ég var auli. Ég var of þungur. Ég drakk bjór. Ég var bara auli. Ég leit í spegil og sagði: „Þú ert betri en þetta.“

Fyrr á þessu ári ætlaði Willi að flytja frá Bretlandi og taka starfi í Philadelphia í Bandaríkjunum en kærastan hans bað hann um að vera áfram í Bretlandi. „Ég geri það sem mér er sagt,“ segir Willis. Hann tók þess í stað starfi sem tenniskennari í Warwick þar sem hann rukkar nemendur sína um 30 pund fyrir klukkutímann, um 5000 krónur íslenskar.

Hann segist þurfa á sínum allra besta leik til að komast áfram á mótinu en hann vonast til að komast í topp hundrað á heimslistanum.