Carragher ráðleggur Klopp að kaupa menn í þessar stöður

Jamie Carragher, knattspyrnusérfræðingur Sky Sports sjónvarpsstöðvarinnar og fyrrum leikmaður Liverpool í sautján ár, sagði sína skoðun á því hvernig væri best fyrir knattspyrnustjórann Jürgen Klopp að styrkja Liverpool-liðið í janúarglugganum.

„Ef ég væri Klopp þá væri ég að velta fyrir mér að ná í markvörð, tvo miðverði og afturliggjandi miðjumann," sagði Jamie Carragher.  „Gleymið þessum sigurleikjum á móti Manchester City og Chelsea. Liðið mætir toppliði bara einu sinni í mánuði og það eru bara fjögur eða fimm slík lið í deildinni," sagði Carragher.

„Newcastle og Watford eru liðin sem Liverpool er að spila á móti stærsta hluta tímabilsins og þessir tapleikir hafa örugglega verið mikið áfall fyrir Klopp. Svona er bara enska úrvalsdeildin og Liverpool hefur ekki leikmenn til að komast í gegnum slíka leiki," sagði Carragher.

Sky Sports tók saman ummæli Jamie Carragher í samantektargrein hjá sér þar sem farið var yfir hvaða leikmenn koma til greina fyrir Liverpool í umræddar stöður.

Jack Butland, hinn 22 ára gamli markvörður Stoke City er þar fremstur á blaði en hann hefur haldið sjö sinnum hreinu á leiktíðinni og varið 80,95 prósent skota sem hafa komið á hann eða hærra hlutfall en allir markverðir deildarinnar. Liverpool hefur einnig verið orðað við Steve Mandanda, fyrirliða og markvörð franska liðsins Marseille sem yrði án efa mun ódýrari kostur.

Miðvörðurinn Martin Skrtel er meiddur og verður frá keppni næstu vikurnar. Það er ekki raunhæft fyrir Liverpool að fá Mats Hummels frá Dortmund en félagið gæti kannski tekið annan miðvörð hjá þýska félaginu. Neven Subotic var meiddur framan af tímabili og missti byrjunarliðssæti sitt til Sokratis Papastathopoulos.

Liverpool hefur einnig verið orðað við Joel Matip, 24 ára miðvörð þýska liðsins Schalke en hann hefur spilað mjög vel í þýsku deildinni á þessu tímabili.

Serbneski miðjumaðurinn Marko Grujic er á leið til Liverpool frá Rauðu Stjörnunni en hann verður í láni í Serbíu út tímabilið. Það hefur aftur á móti verið skrifað um það í enskum miðlum að Klopp vilji fá þýska landsliðsmanninn Ilkay Gundogan sem spilaði fyrir hann hjá Dortmund. Það er þó ekki líklegt að Dortmund vilja selja hann.

Úrslit síðustu leikja sýna það og sanna að Jürgen Klopp þarf að hreinsa til í herbúðum Liverpool og koma með nýtt blóð inn í liðið. Leikmenn sem spiluðu fyrir hann hjá Dortmund eru alltaf í umræðunni en hvort Klopp vilji leita þangað er önnur saga.