Eftirspurn eftir áli sögð vera að aukast

„Í áliðnaði er fjárfest til lengri tíma. Það er auðvitað ljóst að á áratugum verða miklar sveiflur í verði á áli og í augnablikinu er álverð lágt,“ segir Pétur Blöndal, framkvæmdastjóri Samáls, samtaka álframleiðanda.

Eins og Fréttablaðið greindi frá í gær heldur heimsmarkaðsverð á áli enn áfram að lækka og Hörður Arnarson, forstjóri Landsvirkjunar, sagði lægra álverð hafa áhrif á tekjur Landsvirkjunar, en um 30 prósent af tekjunum eru tengd álverði. „Almennt má segja að svona lágt álverð hefur neikvæð áhrif á þau álverkefni sem menn eru að skoða á Íslandi og annars staðar. Það er alveg ljóst að það eru allar líkur á að það dragi úr vilja manna til að auka afköstin,“ sagði Hörður.

Pétur segir að árið í fyrra hafi í sjálfu sér verið ágætt fyrir álið í heiminum, en alltaf sé óvissa á mörkuðum. Nú séu blikur á lofti í efnahag Evrópu vegna Grikklands og þá hafi Kínverjar leitað fyrir sér með útflutning á áli, þar sem hægst hefur á hagvexti í Kína. 

„Góðu fréttirnar eru þær að eftirspurn er að aukast mjög hratt og mun hraðar en spár gerðu ráð fyrir. Hún hefur á fáum árum farið úr 40 milljónum tonna í um 60 milljónir, sem næst væntanlega á þessu ári eða næsta. Það er gríðarleg eftirspurnaraukning sem er meðal annars knúin áfram af kröfu stjórnvalda um að dregið sé úr losun gróðurhúsalofttegunda í bílaflotanum. Það er bara ein leið til þess og það er að létta bílana og fyrir vikið hafa bílaframleiðendur verið að nota ál í miklu meiri mæli en áður og það sér ekki fyrir endann á þeirri þróun. Það eru því heilbrigðismerki á álmarkaðnum.“