Fanning í The Neon Demon

Elle Fanning hefur hreppt aðalhlutverkið í nýjustu mynd Nicolas Winding Refn, The Neon Demon.

„Elle Fanning er ótrúlega svöl ofurkona og ég hlakka til að fara með henni í hryllilegt ferðalag í The Neon Demon,“ sagði danski leikstjórinn Refn í yfirlýsingu. Tökur á myndinni hefjast í mars.

„Einn góðan veðurdag vaknaði ég og áttaði mig á því að ég var umkringdur konum og að þær réðu yfir mér,“ bætti Refn við um myndina. „Á einhvern undarlegan hátt langaði mig að gera hryllingsmynd um grimma fegurð.“

Leikstjórinn er þekktastur fyrir myndina Drive með Ryan Gosling í aðalhlutverki.