Vilja ekki að komið sé í bakið á fólki

Ákvæði um launaþróun í kjarasamningum sem gerðir voru á almenna vinnumarkaðnum í sumar geta grafið undan árangri sem náðst hefur í jafnlaunaátaki karla og kvenna í fjármálafyrirtækjum. Þetta segir Friðbert Traustason, framkvæmdastjóri Samtaka starfsmanna fjármálafyrirtækja (SFF). Samninganefnd SFF átti fyrir hádegi í gær sinn fyrsta samningafund með Samtökum atvinnulífsins (SA) eftir að kjaradeilu félagsins var vísað til ríkissáttasemjara.

Fundurinn segir Friðbert að hafi verið stuttur, ekki nema klukkutími, en viðræðum verði haldið áfram í dag.  Kröfur félagsins segir Friðbert að séu innan þess ramma sem samningar SA við félög ASÍ hafi sett varðandi kostnaðarauka fyrirtækja. „Við höldum okkur á jörðinni og göngum ekki jafnlangt og gerðardómur. Við erum ekki með kröfur um 25 til 30 prósenta hækkun launa,“ segir hann. Gert sé ráð fyrir sama kostnaðarauka af samningi SFF og af öðrum samningum á almenna markaðnum, rúmum 20 prósentum í lok samningstímans.

Um leið áréttar Friðbert að hópurinn að baki SSF sé mjög breiður, allt starfsfólk bankanna annað en æðstu stjórnendur, um helmingurinn sérfræðingar. „Við þurfum að hugsa um heildina og höfum verið frekar á þeim nótum að vilja sömu prósentuhækkun fyrir allan hópinn, en þó líka með ákveðna áherslu á lægsta hópinn.“

Friðbert segir helst bera í milli í viðræðunum hugmyndina um launaþróunartryggingu með baksýnisspegli. Samkvæmt henni fá þeir bara lágmarkshækkun sem fengið hafa einhverjar kjarabætur utan samningsbundinna hækkana mánuðina fyrir gildistöku samnings. 

„Okkur finnst einfaldlega eins og þar sé komið í bakið á fólki sem hefur á eigin vegum í launasamtölum og mögulega með öðrum aðferðum reynt að ýta upp sínum launum síðasta eitt og hálfa árið.“ Öfugsnúið sé að stéttarfélagið komi þá og taki með samningum til baka þann ávinning sem fólk hefur barist fyrir sjálft. „Við skiljum ekki svoleiðis aðferðafræði og ég skil ekki enn af hverju verkalýðsfélögin hin samþykktu þetta.“

Friðbert bendir á að undanfarið eitt og hálft ár hafi í bönkunum átt sér stað sérstakt átak í að jafna kjör karla og kvenna, sérstaklega með því að hækka laun kvenna. Fyrir þetta hafi bankarnir fengið sérstakar viðurkenningar. „Og með þessum baksýnisspegli er þessi árangur í stórhættu.“ Karlar fá þá meiri hækkanir nú vegna hækkana sem konur hafi fengið áður.