„Hæfasta fólkið var ráðið“

Framkvæmdastjóri rannsóknarsviðs Landspítala segir mjög hæfa einstaklinga hafa sótt um stöður geislafræðinga hér þegar þær voru auglýstar erlendis í haust. Hann vísar því á bug að kjarabarátta geislafræðinga hafi haft áhrif á ráðningar spítalans.

Stöð 2 greindi frá því í gær að sex geislafræðingar sem sögðu upp störfum í verkfallinu í sumar hefðu ekki verið endurráðnir á Landspítalann. Konurnar hafa allar mikla reynslu, ein til yfir 30 ára.

„Það var auglýst tvisvar sinnum. Umsækjendurnir voru töluvert margir og mjög margir vel hæfir og góðir umsækjendur. Það var farið eftir þeim hæfnisviðmiðum sem komu fram í auglýsingunni annars vegar og hins vegar í þessum venjulegu reglum sem gilda í ráðningu opinberra starfsmanna. Það voru töluvert margir umsækjendur sem við réðum ekki, íslenskir og erlendir,“ segir Óskar Sesar Reykdalsson, framkvæmdastjóri rannsóknarsviðs Landspítala.

Hann segir kjarabaráttu geislafræðinga ekki hafa haft áhrif á ráðningaferlið.

„Ég hef enga trú á því. Við förum mjög faglega í vinnuna og það er engöngu farið eftir þeim reglum sem gilda um ráðningar opinberra starfsmanna. Þegar það eru 10 - 15 fleiri umsækjendur um störf en við getum tekið inn verðum við að fara eftir þeim viðmiðum sem gilda í auglýsingunni, sem er aðalatriðið,“ segir Óskar.

Mikill skortur hefur verið á geislafræðingum og því auglýsti Landspítali eftir fólki í útlöndum og fékk góð viðbrögð. Í hádegisfréttum Bylgjunnar sagðist Katrín Sigurðardóttir, formaður félags geislafræðinga, efast um að þeir erlendu geislafræðingar sem ráðnir hefðu verið væru með menntun við hæfi. Óskar vísar því á bug og segir mjög hæfa einstaklinga hafa sótt um.

„Þetta var yfirfarið af lögfræðingum, mannauðsfólkinu og stjórnendum á deildinni. Þetta var okkar færasta fólk í ráðningum sem var að vinna að þessu og tel víst að það hafi verið vel gert. Við urðum að gera eitthvað til að reyna að fá inn fólk til að reyna að sinna heilbrigðisþjónustu í landinu eins vel og hægt er,“ segir Óskar.