Býst ekki við að félagsmenn dragi uppsagnir til baka

Formaður félags geislafræðinga, segir ástandið slæmt og býst ekki við að félagsmenn dragi uppsagnir sínar til baka þrátt fyrir niðurstöðu Gerðardóms í gær.

„Okkur fulltrúum félagsins, finnst að þetta hefði geta verið betra,“ segir Katrín Sigurðardóttir, formaður Félags Geislafræðinga, um úrskurð Gerðardóms. Samkvæmt honum hækka laun félagsmanna Bandalags háskólamanna um 7,2 prósent frá mars síðastliðnum og aftur um 5,5 prósent í júní 2016.

25 geislafræðingar hafa sagt upp störfum og taka uppsagnirnar gildi þann fyrsta september næstkomandi. Katrín segist ekki búast við því að félagsmenn dragi uppsagnir sínar til baka. Geislafræðingar séu ósáttir við ástandið á vinnustað sínum og álagið sé afar mikið.

„Það er ástand þarna inni sem mönnum hefur hreinlega ekki lánast að laga og þá er ég að tala um myndgreiningu á Landspítalanum. Síðan er það samningurinn sem var gerður árið 2013. Það hefur ekkert verið staðið við það að fullu. Þannig að fólk er bara mjög óánægt.“

Auk þeirra 25 geislafræðinga sem sögðu upp í kjaradeilunni þá hafa þrettán aðrir hætt á undanförnum tveimur árum. Katrín segir því um að ræða miklu meira álag en áður.

Einn geislafræðingur ætlaði að draga uppsögn sína til baka en fékk ekki þar sem búið var að ráða í stöðu hans. Katrín segir þetta óskiljanlegt þar sem það vanti geislafræðinga og verið sé að manna stöður með nemum sem sé í raun ólöglegt.

„Hann fékk þau svör að það væri ekki verið að auglýsa eftir geislafræðingum og þá sendi viðkomandi inn umsókn. Því fæstir geislafræðingar eru ráðnir eftir auglýsingum. Þá var honum sagt að það væri ekki verið að auglýsa og að umsóknin væri ekki tekin gild. Á þessum tíma vantaði mjög mikið fólk í vinnu og þetta var fyrir verslunarmannahelgi. Helgin var mönnuð með nemum að hluta á einhverjum vöktum sem að er í raun ekki í lagi því menn þurfa að vera útskrifaðir til að vinna starf geislafræðinga.“