Eva Rut Gunnlaugsdóttir var orðin 122 kíló í janúar í fyrra þegar hún fann að botninum var náð. „Ég hef alltaf átt í erfiðleikum með að stjórna hvað ég borða og búin að vera allt of þung síðan ég var átján ára. Eftir að ég átti börnin mín fyrir bráðum sjö árum þá missti ég algjörlega tökin á öllu og þyngdist alveg verulega,“ segir Eva sem verður 35 ára á árinu.  

Þann 22. janúar breytti hún mataræði sínu og tók út vissar fæðutegundir.

„Fyrir mig þá eru þetta bara eiturlyf. Það var aldrei neitt sem hét að borða eitt lítið súkkulaðistykki, það fylgdi alltaf eitthvað meira með,“ segir Eva og bætir við: „Fyrstu tveir, þrír dagarnir voru svolítið erfiðir en síðan þá hef ég verið í svo góðu jafnvægi og á bleiku skýi.“

Andlegur bati var mikill og strax á fyrsta mánuði fannst Evu hún öll léttari og hún losnaði við ýmsa verki sem höfðu hrjáð hana. Kílóin fuku af og eftir 11 mánuði og 10 daga rauf hún 50 kílóa múrinn. Að njóta betur tímans með börnunum sínum, geta valið sér föt, að þurfa ekki að fá framlengingu á belti í flugvélum og geta spjallað við gesti í veislum frekar en að hanga við hlaðborðið eru nokkrir af fjölmörgum kostum nýja lífsstílsins. 

Nánar verður rætt við Evu í Íslandi í dag í opinni dagskrá kl. 18:55 á Stöð 2. Þar ljóstrar hún upp leyndarmálinu um mataræðið og sýndar verða myndir sem hún tók daglega á liðnu ári.