Viðar Örn með yfir 100 milljónir króna í árslaun

Kínverska félagið Jiangsu Guoxin-Sainty greiðir norska félaginu Vålerenga hátt í hálfan milljarð fyrir framherjann Viðar Örn Kjartansson sem er við það að skrifa undir tveggja ára samning við félagið.

Vålerenga hefur staðfest söluna á heimasíðu sinni og kaupverðið er nálægt hálfum milljarði samkvæmt heimildum Vísis. Sömu heimildir herma að Viðar Örn verði einn launahæsti Íslendingurinn nái hann samningi við kínverska félagið eins og allt bendir til. Vísir greindi fyrst frá áhuga kínverskra liða á Viðari í september.

Sjá einnig:Gylfi Þór langlaunahæstur

Hann verður með rúmlega 100 milljónir króna í árslaun í Kína og það eftir skatt. Slík laun eru langt frá því að vera í boði í Noregi.

Kínverskur fótbolti hefur verið á uppleið á síðustu árum og miklir peningar í boltanum þar. Þó svo Viðar Örn hafi verið eftirsóttur af mörgum félögum í Evrópu þá getur ekkert þeirra greitt álíka laun og Jiangsu.

Sjá einnig:Indriði launahæstur í Noregi

Þetta lið varð í áttunda sæti í kínversku úrvalsdeildinni á síðustu leiktíð og spilar í Nanjing. Fylkir, Selfoss og ÍBV munu fá samstöðubætur við þessi kaup sem þýðir að félögin græða tugi milljóna á Viðari Erni.

„Ég hef notið mín hjá Vålerenga og sé ekki eftir því að hafa valið Osló sem upphafsstað á mínum ferli. Ég yfirgef félagið með sorg í hjarta," segir Viðar á heimasíðu félagsins.

„Það er spennandi að flytja til Kína og kynnast allt annarri menningu. Samningurinn er frábær og líka gott að allir hagnast á þessari sölu."