Fór inn á Facebook-aðgang fyrrverandi sambýliskonu og birti myndefni af henni fáklæddri og naktri

Karlmaður á Vestfjörðum hlaut sex mánaða skilorðsbundinn fangelsisdóm í Héraðsdómi Vestfjarða í september fyrir gróf og niðurlægjandi brot gagnvart fyrrverandi sambýliskonu sinni. Fór hann án heimildar inn á Facebook-síðu konunnar, breytti lykilorði og birti myndir af henni naktri og fáklæddri. Særði hann blygðunarkennd konunnar, móðgaði og smánaði opinberlega eins og segir í dómnum.

Brot mannsins áttu sér stað sumarið 2014, nánar tiltekið dagana 29. júní til 1. júlí. Gerði hann þann 29. júní tilraun til brots gegn frjálsræði manna með því að reyna að neyða konuna til síma- og tölvusamskipta við sig, bæði með sms-skilaboðum og í gegnum Skype, með því að hóta henni að birta opinberlega kynferðislegt myndefni og myndir af henni á Facebook.

Degi síðar fór hann án leyfis inn á Facebook-síðu hennar og breytti lykilorðinu. Þar hafði hann aðgang að tölvupóstum hennar, ljósmyndum og ýmsum persónulegum upplýsingum um samskipti við aðra Facebook-vini. Komst konan ekki inn á Facebook-reikning sinn um tíma vegna þessa.

Beit lögreglumann

Daginn eftir, eða 1. júlí, braut hann gegn blygðunarsemi hennar og meiddi æru hennar stórfelldlega með því að birta, á hennar aðgangi, myndefni sem sýndi konuna fáklædda eða nakta. Var lögregla kölluð til og var maðurinn einnig dæmdur fyrir að bíta í upphandlegg lögreglumanns í kyrrstæðum lögreglubíl. Þá fundust skotvopn, tveir rifflar og ein haglabyssa og skotfæri, ásamt skotum sem voru óaðskilin og ekki í læstum hirslum á heimili mannsins.

Maðurinn játaði brot sín skýlaust sem dómurinn tók tillit til. Hann var undir áhrifum áfengis þessa daga en hefur síðan farið í áfengismeðferð og ekki neytt áfengis að eigin sögn sem dómurinn tók sömuleiðis tillit til. Hins vegar var til refsiþyngingar litið til þess að brotin gagnvart fyrrverandi sambýliskonu hans voru gróf og niðurlægjandi. Þá er litið alvarlegum augum til brots hans gegn lögreglumanninum sem hlaut mar og hrufl á upphandlegg.

Varð að niðurstöðu að sex mánaða dómurinn væri skilorðsbundinn. Lögmaður konunnar fór fram á þrjár milljónir króna í bætur en dómurinn mat sem svo að 300 þúsund krónur væru hæfilegar miskabætur.

Dóminn í heild sinni má lesa hér.