Skattrannsóknarstjóri vill birta skattskil mánaðarlega

„Hvernig sem á þetta er litið felst fælingarmáttur í að birta þetta opinberlega, annars væri enginn tilgangur í birtingunni,“ segir Gunnar Th. Kristjánsson, staðgengill skattrannsóknarstjóra, um birtingu álagningarskráa hjá ríkisskattstjóra.

Gunnar bætir við að hann telji að fjölga mætti birtingum og hafa þær mánaðarlega.

Að sögn Gunnars er árlegur viðburður að ábendingum sem skattrannsóknarstjóra berist fjölgi fyrstu dagana og vikurnar eftir að álagningarskrárnar séu birtar. Þó sé misjafnt hvort ábendingarnar eigi við rök að styðjast.

Samkvæmt rannsókn norsku hagstofunnar bötnuðu skattskil í Noregi um þrjú prósent eftir að upplýsingar um skattgreiðslur einstaklinga urðu aðgengilegar á netinu árið 2001. Áður var hægt að nálgast upplýsingarnar í þrjár vikur hjá skattayfirvöldum og á skrifstofum sveitarfélaga, ekki ósvipað því sem nú tíðkast á Íslandi.

Gunnar segir Norðmenn mun opnari fyrir því að deila skattaupplýsingum en Íslendinga. Hann bendir á að í Noregi upplýsi skattayfirvöld um laun einstaklinga sé óskað eftir því. Launþeginn sem óskað sé eftir upplýsingum um fái einnig að vita hver óskaði eftir upplýsingunum.

„Þetta er ekki eins mikið tabú og hér. Heldur ekki fyrir þann sem er með launin, hann veit þá hver er að spyrja,“ segir Gunnar.

Steinþór Haraldsson, staðgengill ríkisskattstjóra, segir embættið ekki hafa skoðun á því hvort birta eigi upplýsingarnar. Embættið fylgi bara lögum. Hins vegar komi alltaf ábendingar eftir fréttaflutning af álagningarseðlum.

Steinþór segist ekki hafa forsendur til að meta hvort birtingin hafi fælingarmátt. „En auðvitað getur maður ímyndað sér það að fólk vilji ekki láta sjá einhvern núll tax á opinberum vettvangi,“ segir Steinþór.