„Þetta er bara algjört draumahlutverk. Og sérstaklega gaman að túlka sjálfa Carmen hér á Spáni. Þetta er algjörlega stærsta hlutverk sem ég hef fengið,“ segir Emilía. Verkið verður frumsýnt í kvöld í Teatro de la Zarzuela í Madríd. „Ég hlakka rosalega til. Þetta er búið að vera mikið stress og ýmislegt sem hefur gengið á. En nú er bara að njóta,“ segir hún.
Undirbúningur fyrir sýninguna, sem er mjög íburðarmikil, hófst fyrir rúmu ári. „Leikstjórinn, hinn sænski Johan Inger, kom og horfði á sýningar og æfingar hjá okkur í dansflokknum. Svo tóku við tveggja vikna prufur þar sem við þurftum að syngja, dansa og leika heilan helling, svo hann tók sér góðan tíma í að velja,“ segir Emilía, sem hreppti að lokum aðalhlutverkið.
„Þetta er alveg ný útgáfa af þessu þekkta verki, en það hafa áður verið gerðar ballettútgáfur af því. Þetta er meiri nútímadans hins vegar.“
Mikið er lagt í sýninguna og prýða stórar auglýsingar með Emilíu strætóa og veggi í neðanjarðarlestargöngum Madrídborgar. „Þetta er svolítið fyndið, en ekkert yfirþyrmandi samt. Madríd er stór borg þannig að ég pæli ekkert í því þannig ef fólk þekkir mig. Fyrir mér skiptir meira máli að njóta þess að sýna verkið,“ segir hún. Eftir frumsýningu taka við tíu sýningar í Madríd, en hópurinn heldur svo í sýningarferð til Þýskalands og um Spán.
Emilía hefur verið búsett á Spáni í þrjú ár, þar sem hún býr með fjölskyldunni sinni; manni og syni. „Ég fór í prufur hjá dansflokknum fyrir þremur árum og komst inn. Okkur leist svo vel á að við fluttumst svo hingað og líkar vel.“
CND - Carmen (trailer) from CND on Vimeo.
